ऋषभ पंत डिसेंबर 2022 मध्ये एका भीषण कार अपघाताचा बळी ठरला होता. या अपघातात तो थोडक्यात बचावला. तो पुन्हा खेळू शकेल याची फारशी आशा नव्हती. मात्र, त्याने हार मानली नाही आणि तंदुरुस्त झाल्यानंतर तो पुन्हा एकदा आंतरराष्ट्रीय क्रिकेटमध्ये आपला ठसा उमटवत आहे. पंतच्या अपघातानंतर जवळपास दोन वर्षांनी आणखी एक भारतीय क्रिकेटर मुशीर खानचा कार अपघात झाला आहे. मिळालेल्या माहितीनुसार, मुशीर त्याचे वडील नौशाद खान यांच्यासोबत इराणी कप मॅचसाठी आझमगडहून लखनऊला जात होते. त्यावेळी त्यांच्या कारला अपघात झाला. यावेळी त्यांची कार सुमारे 4 ते 5 वेळा उलटली, त्यामुळे त्याच्या मानेला दुखापत झाली. यामुळे तो दीड ते तीन महिने मैदानाबाहेर राहू शकतो.
Musheer Khan Car Accident : कोण आहे मुशीर खान? युवराज सिंगला वयाच्या 8 व्या वर्षी केले होते बाद, सचिनने मोडले 2 मोठे रेकॉर्ड
19 वर्षीय मुशीर खानचा जन्म यूपीच्या आझमगड जिल्ह्यात झाला. मात्र, त्याचे बालपण मुंबईत गेले. मुशीर देशांतर्गत क्रिकेटमध्ये मुंबईकडून खेळतो, तर त्याचा भाऊ सरफराज खान टीम इंडियाकडून खेळतो. वयाच्या अवघ्या 17 व्या वर्षी त्याने 2022 मध्ये मुंबईसाठी देशांतर्गत क्रिकेटमध्ये पदार्पण केले. देशांतर्गत क्रिकेटमधील त्याच्या चमकदार कामगिरीनंतर, अंडर-19 विश्वचषकासाठीही त्याची निवड झाली, जिथे त्याने 7 सामन्यांमध्ये 60 च्या सरासरीने 360 धावा केल्या. यात 2 शतके आणि एका अर्धशतकाचाही समावेश आहे.
लहान वयातच सचिनचा विक्रम मोडून मुशीरने स्वतःची वेगळी ओळख निर्माण केली आहे. 2024 पासून, त्याने रणजी ट्रॉफी फायनलमध्ये शतक झळकावून मुंबईला ट्रॉफी जिंकण्यास मदत केली. यासोबतच सचिनचा विक्रम मोडीत काढत, तो रणजी ट्रॉफी फायनलमध्ये शतक झळकावणारा सर्वात तरुण फलंदाज बनला. मुशीर खानने दुलीप ट्रॉफीच्या पदार्पणाच्या सामन्यात 181 धावांची इनिंग खेळली होती. या खेळीसह त्याने सचिनचा आणखी एक विक्रम मोडला. दुलीप ट्रॉफीच्या पदार्पणाच्या सामन्यात सचिनने 159 धावांची खेळी केली होती.
मुशीर खान लहानपणापासूनच आपल्या प्रतिभेची छाप सोडत आहेत. यामध्ये त्याच्या वडिलांचे मोठे योगदान आहे. मुशीर अवघ्या 8 वर्षांचा असताना त्याने युवराज सिंगला बाद केले होते. वास्तविक, 2013 मध्ये कांगा क्रिकेट लीगपूर्वी मुशीर खान सराव सामना खेळण्यासाठी गेला होता. त्यात भारताचा महान अष्टपैलू युवराज सिंगही उपस्थित होता.
या सराव सामन्यात मुशीरला युवराजसमोर गोलंदाजी करण्याची संधी मिळाली. त्यानंतर त्याने युवराजला बाद केले. यानंतर मुशीर रातोरात प्रसिद्ध झाला. या सामन्यानंतर त्याचे वडील आणि मुशीर यांना रेल्वे स्टेशनच्या फलाटावर झोपावे लागले. कारण मुशीर खानला त्याच रात्री घरी परतायचे होते, पण त्याची ट्रेन चुकली. त्याच्या वडिलांकडे हॉटेलमध्ये राहण्यासाठी पैसे नव्हते. त्यामुळे दोघांना प्लॅटफॉर्मवरच झोपावे लागले.