पाकिस्तानला पुन्हा हरवू, देश सोडून गेलेल्या खेळाडूचे जाहीर वक्तव्य

2024 च्या टी-20 विश्वचषकात पाकिस्तानला खूप अपमानाला सामोरे जावे लागले होते. या स्पर्धेत प्रथमच खेळणाऱ्या अमेरिकन संघाने बाजी मारली. दोन्ही संघांमधील हा सामना सुपर ओव्हरपर्यंत गेला, जिथे अमेरिकन संघ विजय मिळवण्यात यशस्वी ठरला. या विजयात वेगवान गोलंदाज अली खानचे महत्त्वाचे योगदान होते. नुकत्याच झालेल्या या विजयाची आठवण करून देत त्याने एका मुलाखतीत सांगितले की, आम्ही पाकिस्तानला पुन्हा हरवू शकतो.

अली खान म्हणाला, आम्ही त्यांना (पाकिस्तान) पुन्हा पराभूत करण्यास सक्षम आहोत. मला त्यांचा अनादर करायचा नाही, पण मला वाटते की आम्ही खरोखरच चांगला संघ आहोत, जर आमच्याकडे पूर्ण ताकदीचा संघ असेल, तर आम्ही आमच्या दिवशी कोणत्याही संघाला हरवू शकतो, फक्त पाकिस्तानलाच नाही. जर आम्ही पुन्हा त्यांच्याशी सामना केला, तर तो एक चांगला सामना असेल.

दोन्ही संघांमध्ये गटसाखळीत हा सामना रंगला. या सामन्यात पाकिस्तानने प्रथम खेळताना निर्धारित 20 षटकात 159 धावा केल्या होत्या. 160 धावांच्या लक्ष्याचा पाठलाग करण्यासाठी आलेल्या यूएसए संघाने शानदार फलंदाजी करत सर्वांनाच आश्चर्याचा धक्का दिला. मात्र, अमेरिकन संघाला 20 षटकांत तीन गडी गमावून 159 धावाही करता आल्या. अशा परिस्थितीत सामन्याचा निकाल सुपर ओव्हरमध्ये लागला. सुपर ओव्हरमध्ये प्रथम फलंदाजी करताना अमेरिकेने 18 धावा केल्या आणि पाकिस्तानला 13 धावांवर रोखले. त्यामुळे तो मोठा अपसेट करण्यात यशस्वी ठरला.

अली खान याचे पूर्ण नाव मोहम्मद अहसान अली खान आहे. तो पाकिस्तानचा रहिवासी आहे. 13 डिसेंबर 1990 रोजी अटॉक, पाकिस्तान येथे जन्मलेला अली वयाच्या 19 व्या वर्षी 2010 मध्ये आपल्या पालकांसह अमेरिकेत गेला. यानंतर त्याने अमेरिकेतच क्रिकेटमध्ये आपली कारकीर्द घडवली. इंडियानापोलिस येथील आयसीसी अमेरिका ओपन ट्रायलमध्ये अली प्रथम प्रकाशझोतात आला. तो आयपीएलमध्ये केकेआर संघाचाही भाग होता. पण त्याला पदार्पणाची संधी मिळाली नाही.