‘पुरानी हवेली’ आणि ‘वीराणा’ सारख्या चित्रपटांनी घाबरवणारे गंगू रामसे यांनी वयाच्या 83 व्या वर्षी घेतला अखेरचा श्वास

मनोरंजन, व्हिडिओ, सर्वात लोकप्रिय / By / गंगू रामसे, निधन, रामसे ब्रदर्स /


ज्येष्ठ चित्रपट निर्माते, दिग्दर्शक आणि सिनेमॅटोग्राफर गंगू रामसे यांचे निधन झाले आहे. गंगू रामसे यांनी रविवारी 7 एप्रिल 2024 रोजी वयाच्या 83 व्या वर्षी या जगाचा निरोप घेतला, ते गेल्या एक महिन्यापासून आजारी होते. त्यांच्यावर मुंबईतील कोकिलाबेन धीरूभाई अंबानी रुग्णालयात उपचार सुरू होते. ‘हॉरर फिल्म्सचा राजा’ म्हणून ओळखल्या जाणाऱ्या ‘रामसे ब्रदर्स’चे गंगू रामसे हे महत्त्वाचा भाग होते. गंगू रामसे यांच्या मृत्यूची पुष्टी करणारे रामसे कुटुंबाकडून अधिकृत निवेदन जारी करण्यात आले आहे.

रामसे कुटुंबाने जारी केलेल्या निवेदनात असे म्हटले आहे की, अत्यंत दु:खाने आम्हाला ही माहिती सामायिक करायची आहे की एफ.यू. रामसे यांचा दुसरा मोठा मुलगा आणि ज्येष्ठ सिनेमॅटोग्राफर, चित्रपट निर्माता, रामसे ब्रदर्स टीमचे निर्माते गंगू रामसे यांचे निधन झाले आहे. आज सकाळी 8 वाजता त्यांनी अखेरचा श्वास घेतला. गेल्या एक महिन्यापासून ते आरोग्याशी संबंधित समस्यांनी त्रस्त होते.

गंगू रामसे हे फतेहचंद रामसिंघानी यांचा दुसरा मोठा मुलगा होता. त्यावेळी इंग्रजांना फतेहचंद रामसिंघानी हे नाव उच्चारण्यात खूप अडचण येत होती आणि म्हणून त्याने रामसिंघानी हे नाव बदलून रॅमसे ठेवले आणि नंतर रॅमसेचे रामसे झाले. फतेह चंद यांनी आपल्या सात मुलांसह ‘रामसे ब्रदर्स’ नावाचा हॉरर चित्रपटांचा ब्रँड तयार केला. रामसे ब्रदर्सने रुपेरी पडद्यावर लोकांना अशा प्रकारे घाबरवले की ते ‘हॉरर फिल्म्सचे बादशाह’ बनले.

देश स्वतंत्र होण्यापूर्वी रामसे यांचा लाहोर आणि कराची, पाकिस्तानमध्ये रेडिओचा व्यवसाय होता. फाळणीनंतर ते कुटुंबासह मुंबईत आले. त्यांनी मुंबईत रेडिओचे दुकान सुरू केले. फतेहचंद रामसे यांच्या सात मुलांपैकी काही रेडिओ बनवण्याच्या तंत्रज्ञानात चांगले होते. एका मुलाचा टेलरिंग आणि गारमेंटचा व्यवसाय होता. पण फतेहचंद यांना त्यांच्या मुलांनी असा कोणताही व्यवसाय करावा, असे वाटत नव्हते. त्यांना चित्रपटांची आवड होती. त्यामुळेच त्यांना चित्रपटसृष्टीत येण्याची इच्छा होती.


सुरुवातीला फतेह चंद यांनी 1954 मध्ये रिलीज झालेल्या ‘शहीद-ए-आझम भगतसिंग’सह इतर काही चित्रपटांमध्ये गुंतवणूक केली. त्यानंतर 1964 मध्ये त्यांनी स्वतः ‘रुस्तम सोहराब’ चित्रपटाची निर्मिती केली. ‘रुस्तम सोहराब’सारखा ऐतिहासिक चित्रपट बनवायला खूप वेळ लागला आणि त्यासाठी खूप पैसाही खर्च झाला, असे त्यांचे नातू दीपक रामसे यांनी सांगितले. पण त्याचा विशेष अर्थ नव्हता. त्यावेळी आजोबांना खूप अडचणी येत होत्या. या चित्रपटात काम करणाऱ्या दिग्दर्शक आणि तंत्रज्ञांनाही खूप त्रास सहन करावा लागला आणि त्यामुळेच त्यांनी आपल्या मुलांना अशाप्रकारे प्रशिक्षण दिले की ‘रामसे ब्रदर्स’ची टीम तयार झाली आणि त्यांनी स्वतः चित्रपट बनवायला सुरुवात केली.

‘दो गज जमीन के पास’च्या प्रचंड यशानंतर रामसे बंधूंनी हॉरर चित्रपटांची मालिका सुरू केली. दरवाजा, गेस्ट हाऊस, पुराण मंदिर, पुरानी हवेली, बंद दरवाजा आणि वीराणा यांसारखे अनेक हिट हॉरर चित्रपट त्यांनी केले. 70 आणि 80 च्या दशकात रामसे बंधूंनी सुमारे 45 चित्रपट केले. त्यांनी स्वत:च्या नावावर एक अनोखा ब्रँड तयार केला. आजच्या काळात लक्ष्मी, स्त्री, भूल भुलैया सारखे चित्रपट ‘हॉरर कॉमेडी’ जॉनर म्हणून ओळखले जातात. सध्याचे काही प्रेक्षक रामसे ब्रदर्सच्या भयपट चित्रपटांना कमी दर्जाचे मानतात. पण रामसे ब्रदर्सचे हॉरर चित्रपट हे प्रेक्षकाच्या पसंती दर 10 वर्षांनी कशा बदलतात, याचे उत्तम उदाहरण आहे. अजय देवगण लवकरच हॉरर चित्रपटांचे साम्राज्य निर्माण करणाऱ्या ‘रामसे ब्रदर्स’वर वेब सिरीज बनवणार असल्याचे ऐकायला मिळत आहे.