ऋतिक रोशन आणि ज्युनियर एनटीआर ‘वॉर 2’ या चित्रपटातून पहिल्यांदाच स्क्रीन शेअर करणार आहेत. ज्युनियर एनटीआर ऋतिक रोशनसोबत ‘वॉर 2’मधून बॉलिवूडमध्ये पदार्पण करणार आहे. दोघेही या चित्रपटात ॲक्शन करताना दिसणार आहेत. या चित्रपटात ऋतिक रोशन त्याच्या जुन्याच भूमिकेत दिसणार आहे आणि एनटीआर या चित्रपटाद्वारे त्याचे भव्य पदार्पण करणार आहे. ज्युनियर एनटीआरबाबत असे बोलले जात होते की, या चित्रपटातील त्याचे ॲक्शन सीन त्याच्या डुप्लिकेटसोबत शूट केले जात आहेत, पण आता ही बातमी चुकीची असल्याचे बोलले जात आहे.
ज्युनियर एनटीआरने स्वतः ‘देवरा’ आणि ‘आरआरआर’ सारख्या ॲक्शन थ्रिलर चित्रपटांमध्ये ॲक्शन सीक्वेन्स केले आहेत. पण ‘वॉर 2’ बद्दल माहिती होती की त्याचा डुप्लिकेट अॅक्शनसाठी वापरला जात होता, परंतु आता 123 तेलुगु डॉट कॉमच्या रिपोर्टनुसार, ही बातमी खोटी आहे. ज्युनियर एनटीआरला चित्रपटाच्या प्रेक्षकांची फसवणूक करायची नाही. त्याने चित्रपट निर्मात्यांना स्पष्टपणे कळवले आहे की तो ॲक्शन सीन्स स्वतः करणार आहे आणि कोणत्याही डुप्लिकेटचा वापर करणार नाही.
यासोबतच ज्युनियर एनटीआर हा ॲक्शन हिरो असल्याचे सांगण्यात आले. त्याच्या चित्रपटातील ॲक्शन सीन्स तो स्वतः करतो. ऋतिक रोशनसोबतही तो स्वत: या चित्रपटात ॲक्शन सीन्स करणार आहे. वृत्तानुसार, निर्मात्यांनी सांगितले की डुप्लिकेटबद्दलच्या सर्व बातम्या खोट्या आहेत. तर अयान मुखर्जीच्या दिग्दर्शनाखाली बनत असलेला ‘वॉर 2’ हा ॲक्शनपट आहे. कियारा अडवाणीही या चित्रपटात आहे. वर्क फ्रंटबद्दल बोलायचे झाले तर, ज्युनियर एनटीआर पहिल्यांदा जान्हवी कपूर आणि सैफ अली खानसोबत ‘देवरा’ चित्रपटात दिसणार आहे.
‘वॉर 2’ हा 2019 मध्ये आलेल्या ‘वॉर’ चित्रपटाचा सिक्वेल आहे. यामध्ये निर्माते उत्तर आणि दक्षिणेतील दोन मोठे स्टार्स एकत्र आणत आहेत. याला संपूर्ण भारतीय चित्रपट म्हटले, तर चुकीचे ठरणार नाही. पुढील महिन्यापासून ऋतिक आणि ज्युनियर एनटीआर 100 दिवस एकत्र शूट करणार आहेत. पुढील वर्षी 14 ऑगस्टला हा चित्रपट प्रदर्शित होऊ शकतो. ‘वॉर 2’ हा YRF स्पाय युनिव्हर्सचा सहावा चित्रपट असेल. याआधी ‘एक था टायगर’, ‘टायगर जिंदा है’, ‘वॉर’, ‘पठाण’ आणि ‘टायगर 3’ आले आहेत.