कॅरेबियन प्रीमियर लीगच्या चालू हंगामात एक नवीन नियम लागू झाला आहे. फुटबॉलप्रमाणेच आता या लीगमध्येही रेड कार्ड दिले जात असून सुनील नरेन त्याचा पहिला बळी ठरला आहे. त्रिनिबागो नाईट रायडर्स आणि सेंट किट्स नेविस यांच्यात झालेल्या सामन्यात नाईट रायडर्सच्या नरेनला रेड कार्डमुळे बाहेर जावे लागले आणि त्यामुळे शेवटच्या षटकात संघाला केवळ 10 खेळाडूंसह खेळावे लागले. यावर नाइट रायडर्सचा कर्णधार किरॉन पोलार्ड चांगलाच संतापला. मात्र हा सामना जिंकण्यात त्यांचा संघ यशस्वी ठरला. नाइट रायडर्सने हा सामना सहा विकेट्स राखून जिंकला.
या सीपीएल सामन्यात प्रथम फलंदाजी करणाऱ्या नेव्हिसने निर्धारित 20 षटकात पाच गडी गमावून 178 धावा केल्या. त्यासाठी शेरफेन रदरफोर्डने 38 चेंडूत नाबाद 62 धावा केल्या. नाइट रायडर्सने 17.1 षटकांत चार विकेट गमावून हे लक्ष्य गाठले.
SENT OFF! The 1st ever red card in CPL history. Sunil Narine gets his marching orders 🚨 #CPL23 #SKNPvTKR #RedCard #CricketPlayedLouder #BiggestPartyInSport pic.twitter.com/YU1NqdOgEX
— CPL T20 (@CPL) August 28, 2023
सेंट किट्सच्या इनिंग दरम्यान ही गोष्ट घडली. पोलार्डच्या नेतृत्वाखाली नाईट रायडर्स संघ 19 षटके वेळेत पूर्ण करू शकला नाही आणि त्यामुळेच त्याला नियमांनुसार लाल कार्ड दाखवण्यात आले, म्हणजे संघाला आपल्या एका खेळाडूला बाहेर पाठवावे लागले आणि पोलार्डने सुनील नरेनची निवड केली. हे याशिवाय संघाला 30 यार्ड सर्कलच्या बाहेर फक्त दोनच खेळाडू ठेवण्याची परवानगी देण्यात आली होती. पोलार्ड या प्रकरणावर नाराज दिसत होता.
नाईट रायडर्स संघाने शेवटच्या षटकात 18 धावा दिल्या, पण त्यांच्याकडे असे फलंदाज होते जे धावांचा वेग वेगाने वाढवू शकत होते. संघाकडे पोलार्ड आणि आंद्रे रसेलसारखे तुफानी फलंदाज होते, त्यांनी आपले काम चोख बजावले, पोलार्डने 16 चेंडूत पाच षटकारांच्या मदतीने 37 धावा केल्या. रसेलने आठ चेंडूंत दोन चौकार आणि दोन षटकारांच्या मदतीने नाबाद 23 धावा केल्या. या दोघांपूर्वी निकोलस पूरन आणि लॉर्कन टकर यांनीही चांगली खेळी केली होती. पूरनने 32 चेंडूंत पाच चौकार आणि चार षटकारांच्या मदतीने 61 धावा केल्या. टकरने 31 चेंडूंत तीन चौकार आणि एका षटकाराच्या मदतीने 36 धावांची खेळी केली.