मुंबई – सायरस मिस्त्री (54) यांचा रस्ता अपघातात मृत्यू झाल्याने कॉर्पोरेट जगताला धक्का बसला आहे. मुंबई-अहमदाबाद महामार्गावरील पुलाच्या रेलिंगला मिस्त्री यांची कार धडकली. या अपघातात मिस्त्री आणि त्यांचा मित्र जहांगीर दिनशा पांडोळे यांचा मृत्यू झाला. मिस्त्री अशा कोणत्याही सामान्य कारमध्ये नव्हते, ते मर्सिडीज बेंझ जीएलसी नावाच्या एसयूव्हीमध्ये होते. सुमारे 70 लाख रुपयांची ही कार आरामापासून सुरक्षेपर्यंतच्या सर्व दाव्यांसह येते. पोलिसांनी दिलेल्या माहितीनुसार, जहांगीरचा भाऊ दारीस पांडोळे आणि त्याची पत्नी अनायता समोरच्या सीटवर बसले होते. अनायता पांडोळे गाडी चालवत होत्या. दोघांनाही गंभीर दुखापत झाली असली, तरी ते धोक्याबाहेर आहेत. सायरस आणि जहांगीर मागच्या सीटवर बसले होते आणि दोघांचा मृत्यू झाला. अशा परिस्थितीत मागच्या सीटच्या एअरबॅग्स कामी आल्या नाहीत का, असा प्रश्न उपस्थित होत आहे. दोघांनी सीट बेल्ट घातला नसावा, असे पोलिसांचे म्हणणे आहे. सर्वात महत्त्वाची गोष्ट अशी आहे की कार कितीही महाग असली तरीही रस्त्यावर सुरक्षिततेची हमी नसते. वाहतुकीचे सर्व नियम आणि खबरदारी पाळणे अत्यंत आवश्यक आहे.
सायरस मिस्त्री यांच्या गाडीचा अपघात केव्हा, कुठे आणि कसा झाला?
सायरस मिस्त्री यांच्या कारचा अपघात रविवारी (4 सप्टेंबर 2022) दुपारी 3.15 वाजता पालघर जिल्ह्यातील चारोटी येथे सूर्या नदीवर बांधलेला पूलाजवळ झाला. मिस्त्री यांच्यासह कारमधील चौघेजण सकाळी गुजरातमधील उदवाडा येथील इराणशाह या पारशी मंदिरात गेले होते. तेथून परतत असताना हा अपघात झाला. डोक्याला मार लागल्याने मागील सीटवर बसलेले मिस्त्री आणि जहांगीर यांचा जागीच मृत्यू झाला. मर्सिडीज चालवणाऱ्या अनायता आणि तिच्या पतीला अनेक फ्रॅक्चर झाले. दोघांनाही वापी येथील रुग्णालयात दाखल करण्यात आले आहे.
मर्सिडीजवरील नियंत्रण सुटल्याने अपघात?
मर्सिडीजमध्ये बसलेले चौघेजण मित्राच्या ठिकाणाहून जेवण करून परतत होते. अपघात झाला तेव्हा कार तीन लेन चारोटी टोल नाक्यावरून बाहेर पडल्यानंतर जेमतेम एक किलोमीटर पुढे गेली असावी. पालघरचे एसपी बाळासाहेब पाटील यांनी जहांगीर आणि मिस्त्री यांचा जागीच मृत्यू झाल्याची पुष्टी केली.
जुन्या पुलावरून जाताना अनायताचा कारवरील ताबा सुटला, असे प्राथमिक पोलिस तपासात निष्पन्न झाले आहे. जुना पूल नवीन पुलाच्या थोडा खाली आहे. घटनास्थळी भेट दिलेल्या पोलिसांच्या म्हणण्यानुसार, कार वेगात असल्याने अनायता कोणत्या पुलावरून जायचे हे ठरवू शकले नसल्याची शक्यता आहे. पोलिसांनी आकस्मिक मृत्यूची नोंद केली आहे.
दोघांनी लावला नव्हता सीट बेल्ट, उशिरा उघडल्या एअरबॅग ?
वैद्यकीय अधीक्षक प्रदीप धोडी यांनी सांगितले की, मिस्त्री आणि जहांगीर या दोघांचे समोरच्या सीटवर डोके आपटले. डोक्याला मार लागल्याने त्यांचा मृत्यू झाला. मर्सिडीज-बेंझ जीएलसीला मागील सीटच्या प्रवाशांसाठी साइड कर्टन एअरबॅग्ज मिळतात. या एअरबॅग उघडल्या, खऱ्या पण खूप उशीर झाला होता.
पोलिसांनी दिलेल्या माहितीनुसार, सायरस आणि जहांगीर यांनी सीट बेल्ट लावला नसल्याने बॅग उघडण्यापूर्वी त्यांचे डोके पुढच्या सीटवर आदळले. पोलिसांनी सांगितले की, अनायता आणि डॅरिसचे प्राण वाचले, कारण त्यांनी सीट बेल्ट घातला होता आणि त्यांची एअरबॅग वेळेवर उघडली.
मिस्त्री ज्या कारमध्ये प्रवास करत होते, ती एंट्री मॉडेलनंतरची दुसरी मर्सिडीज मॉडेल होती. कारचा नोंदणी क्रमांक MH 47B AB7705 होता, जो मे 2018 मध्ये नोंदणी झाला होता. या Mercedes-Benz GLC चे फिटनेस प्रमाणपत्र मे 2033 मध्ये कालबाह्य होणार आहे.
अपघात एवढा भीषण होता की कारचे इंजिन चाकांच्या मागे गेले. बॉनेट व्यवस्थित होते. जवळपास सीसीटीव्ही नसल्याने अपघाताचे कोणतेही फुटेज पोलिसांकडे नाही. मात्र, उपमुख्यमंत्री आणि गृहमंत्री देवेंद्र फडणवीस यांनी अपघाताच्या सखोल चौकशीचे आदेश दिले आहेत.
नॅशनल क्राईम रेकॉर्ड ब्युरो (NCRB) च्या ताज्या आकडेवारीने रस्ते अपघातांचे भयानक चित्र समारे आले आहे. गेल्या काही वर्षांत, 60% रस्ते अपघात अतिवेगाने झाले आहेत. रस्ते अपघातांमध्ये 55-57% मृत्यू हे वेगामुळे होतात.
तज्ज्ञांच्या मते मुंबई-अहमदाबाद महामार्गाचे व्यवस्थापन योग्य पद्धतीने होत नाही. अशा परिस्थितीत त्यावर भरधाव वेगाने कार चालवणे जीवघेणे ठरू शकते.
अनेक मोठी नावे ठरली आहेत रस्ते अपघातांची बळी
सायरस मिस्त्री यांच्या मृत्यूला जबाबदार कोण? रॅश ड्रायव्हिंग, खराब रस्ता, निष्काळजीपणा की खराब एअरबॅग? यापूर्वीही अनेक सेलिब्रिटींना रस्ते अपघातात जीव गमवावा लागला आहे. भाजपचे ज्येष्ठ नेते गोपीनाथ मुंडे यांचे 2014 मध्ये दिल्लीत एका रस्ते अपघातात निधन झाले. एनटी रामाराव यांचा मुलगा नंदमुरारी कृष्ण याला 29 ऑगस्ट 2018 रोजी एका भीषण कार अपघातात प्राण गमवावे लागले. पंजाबी अभिनेता आणि कार्यकर्ता दीप सिद्धू यांची कार यावर्षी फेब्रुवारीमध्ये एका ट्रकला धडकली होती. या अपघातात सिद्धूचा मृत्यू झाला. दिल्लीचे माजी मुख्यमंत्री आणि केंद्रीय मंत्री साहिब सिंग वर्मा यांचा जून 2007 मध्ये राजस्थानमध्ये एका रस्ते अपघातात मृत्यू झाला. माजी केंद्रीय मंत्री राजेश पायलट हे जून 2000 मध्ये एका रस्ते अपघाताला बळी पडले होते. भारताचे 7 वे राष्ट्रपती ग्यानी झैल सिंग यांचाही रस्ते अपघातात मृत्यू झाला होता.