नवी दिल्ली : कर्नाटकातील अल्पवयीन मुलींवर लैंगिक अत्याचार केल्याप्रकरणी श्री मुरुघा मठाचे मुख्य पुजारी शिवमूर्ती मुरुघा शरनारू यांची तुरुंगात रवानगी करण्यात आली आहे. अटकेनंतर शिवमूर्ती मुरुघ याला 14 दिवसांच्या न्यायालयीन कोठडीत चित्रदुर्गाच्या जिल्हा कारागृहात पाठवण्यात आले आहे. यानंतर आता त्याची चौकशी करता यावी, यासाठी पोलीस त्याला न्यायालयात रिमांडवर घेण्याची मागणी करणार आहेत.
याआधी मंगळवारी चित्रदुर्गाच्या जिल्हा व सत्र न्यायालयाने मुरुघ मठाचे मुख्य पुजारी शिवमूर्ती मुरुघ यांच्या अटकपूर्व जामीन अर्जावर स्थगिती दिली होती. पुजारी विरुद्ध बाल लैंगिक अपराध संरक्षण म्हणजेच पॉक्सो कायद्यान्वये गुन्हा दाखल करण्यात आला आहे. पोलीस ठाण्यात दाखल एफआयआरनुसार, महंत शिवमूर्ती यांनी या मुलींचे दोन वर्षांहून अधिक काळ लैंगिक शोषण केले.
जाणून घ्या 10 मोठ्या गोष्टी
- शिवमूर्ती मुरुघ शरनारू हे मुरुघ मठाचे प्रमुख महंत आहेत, हे मठ प्रमुख लिंगायत मठांपैकी एक आहे.
- दोन मुलींचे लैंगिक शोषण केल्याप्रकरणी भारतीय दंड संहिता, लैंगिक गुन्ह्यांपासून मुलांचे संरक्षण (POCSO), अनुसूचित जाती-जमाती (अत्याचार) आणि भारतीय दंड संहितेच्या विविध कलमांतर्गत शरनारूविरुद्ध गुन्हा दाखल करण्यात आला आहे.
- म्हैसूर आणि चित्रदुर्गातील सामाजिक संघटनांनी केलेल्या मोठ्या निषेधानंतर महंत यांना अटक करण्यात आली. त्याच्या अटकेनंतर, शिवमूर्ती मुरुघला दंडाधिकारी न्यायालयात हजर करण्यात आले, तेथून त्याला 14 दिवसांची न्यायालयीन कोठडी सुनावण्यात आली.
- एफआयआर दाखल झाल्यानंतर सात दिवसांनी महंत यांना अटक करण्यात आली. अटक टाळण्यासाठी शरनारू यांनी अटकपूर्व जामीन याचिका दाखल केली होती, ती फेटाळण्यात आली.
- या प्रकरणात महंत यांच्याशिवाय आणखी पाच जण आरोपी आहेत. मठाच्या वसतिगृहाच्या वॉर्डनचा समावेश आहे.
- जानेवारी 2019 ते जून 2022 या कालावधीत मठ संचलित शाळेत शिकणाऱ्या आणि वसतिगृहात राहणाऱ्या 15 आणि 16 वर्षांच्या दोन मुलींवर लैंगिक अत्याचार झाल्याचा आरोप आहे.
- गेल्या महिन्यात काँग्रेस नेते राहुल गांधी यांनी पक्षाच्या नेत्यांसह चित्रदुर्गातील मुरुघ मठाला भेट दिली होती. येथे राहुल गांधींनाही लिंग दीक्षा देण्यात आली.
- मुरुघ मठ ही एक प्रभावी संस्था म्हणूनही ओळखली जाते. येथे भेट देणाऱ्या राजकारण्यांची एक लांबलचक यादी आहे.
- 2020 मध्ये, जेव्हा तत्कालीन मुख्यमंत्री बीएस येडियुरप्पा यांची जागा घेतली जाईल अशी अटकळ होती, तेव्हा मुरुघ मठाचे शिवमूर्ती हे येडियुरप्पा यांना जाहीरपणे पाठिंबा देणाऱ्या पहिल्या धार्मिक नेत्यांपैकी एक होते.
अटकेच्या काही दिवस आधी शिवमूर्ती यांनी प्रसारमाध्यमांना सांगितले की, मठाच्या विरोधात षडयंत्र रचण्याची ही पहिलीच वेळ नाही. गेल्या 15 वर्षांपासून हे सुरू आहे. मठातील हे कारस्थान लोकांसमोर येऊ नयेत. मला एवढेच म्हणायचे आहे की, आरोप खोटे आणि बिनबुडाचे असल्याने मी स्वच्छ बाहेर येईन. तपासात पूर्ण सहकार्य करून ते तार्किक अंतापर्यंत नेण्यास मदत करू. कारण सत्याचा विजय होईल आणि आपले निर्दोषत्व सिद्ध होईल.