मुंबई : शिवसेनेच्या 40 आमदारांनंतर आता पक्षाचे 12 खासदार मुख्यमंत्री एकनाथ शिंदे यांच्या गोटात जाण्याच्या तयारीत आहेत. असा दावा शिंदे गटाचे आमदार व माजी मंत्री गुलाबराव पाटील यांनी केला. एक दिवस अगोदर शिवसेनेचे दक्षिण मध्य मुंबईतील खासदार राहुल शेवाळे यांनी उद्धव ठाकरेंना पत्र लिहून राष्ट्रपतीपदाच्या निवडणुकीत भाजपच्या उमेदवार द्रौपदी मुर्मू यांच्या बाजूने मतदान करावे असे म्हटले आहे. तर शिवसेनेने आधीच विरोधी उमेदवार यशवंत सिन्हा यांना पाठिंबा दिला आहे.
शिवसेनेत जिथे उद्धव ठाकरेंचा आदेश सर्वोच्च मानला जातो, तिथे राहुल शेवाळे यांनी त्यांना पत्र लिहून आपली भूमिका मांडली आहे. त्यामुळे शिवसेनेचे खासदार शिंदे गटात सामील झाल्याच्या चर्चेलाही वेग आला आहे. 55 पैकी 40 आमदारांशिवाय 22 माजी आमदारही आमच्यासोबत असल्याचा दावा गुलाबराव पाटील यांनी केला. शिंदे गट हीच खरी शिवसेना असून शिंदे गटच शिवसेनेचा सन्मान बहाल करेल, असे पाटील म्हणाले.
किती खासदार कोणासोबत आहेत?
शिंदे गटात येणाऱ्या शिवसेनेच्या खासदारांमध्ये पहिले नाव त्यांचे पुत्र कल्याणचे खासदार श्रीकांत शिंदे यांचे आहे. याशिवाय रामटेकमधून रामकृपाल तुमाने, हिंगोलीतून हेमंत पाटील, शिर्डीतून सदाशिव लोखंडे, यवतमाळमधून भावना गवळी, दक्षिण-मध्य मुंबईतून राहुल शेवाळे, बुलढाणामधून प्रतापराव जाधव, पालघरमधून राजेंद्र गावित, नाशिकमधून हेमंत गोडसे, मावळमधून श्रीरंग बारणे यांची आणि ठाण्यातून राजन विचारे यांच्या नावाची चर्चा आहे.
त्याचवेळी उद्धव ठाकरे कॅम्पमध्ये दक्षिण मुंबईतून अरविंद सावंत, उत्तर-पश्चिम मुंबईतून गजानन कीर्तिकर, उस्मानाबादमधून ओमराजे निंबाळकर, हातकलंगणेतून धैर्यशील माने, परभणीतून संजय बंडू जाधव, कोल्हापूरमधून संजय मंडलिक आणि दादरा नगर हवेलीमधून कलाबेन देऊळकर यांचा समावेश आहे.
शिवसेनेच्या याचिकेमुळे मंत्रिमंडळ विस्तारावर टांगती तलवार
उद्धव ठाकरे गटाच्या याचिकेमुळे महाराष्ट्रातील एकनाथ शिंदे सरकारमधील नव्या मंत्रिमंडळाचा विस्तार रखडला आहे. शिंदे गटाच्या 16 आमदारांना अपात्र ठरवण्यासाठी उद्धव गटाने सर्वोच्च न्यायालयात याचिका दाखल केली असून, त्यावर सुनावणी झाल्यानंतरच मंत्रिमंडळाचा विस्तार होण्याची शक्यता आहे.
पक्षाचा व्हिप न मानण्याच्या विधानसभा अध्यक्षांच्या निर्णयाला शिवसेनेच्या उद्धव ठाकरे गटाने आव्हान दिले आहे. सुप्रीम कोर्ट 11 जुलै रोजी सर्व याचिकांवर सुनावणी करणार आहे. यानंतर राज्यात मंत्रिमंडळाचा विस्तार होणार आहे.
शिवसेनेने 55 पैकी 40 आमदार फोडल्यानंतर राज्यपाल भगतसिंग कोश्यारी यांनी तत्कालीन मुख्यमंत्री उद्धव ठाकरे यांना फ्लोअर टेस्ट करण्याचे आदेश दिले. पण उद्धव ठाकरे यांनी फ्लोअर टेस्टला सामोरे जाण्याच्या एक दिवस आधी राजीनामा दिला होता.