नवी दिल्ली – जगातील सर्वात श्रीमंत व्यक्ती एलन मस्क यांनी ट्विटर विकत घेतल्यापासून काही ना काही बातम्या समोर येत आहेत. आता असे समोर आले आहे की सीईओ पराग अग्रवाल यांना लवकरच ट्विटरमधून काढून टाकले जाऊ शकते. याशिवाय भारतीय वंशाच्या विजया गाडे यांनाही मस्क काढून टाकू शकतात. विजया सध्या ट्विटरच्या कायदेशीर प्रमुख आहेत.
मीडिया रिपोर्ट्सनुसार, एलन मस्क कंपनीच्या उच्च व्यवस्थापनावर खूश नाहीत आणि त्यांनी ट्विटरचे चेअरमन ब्रेट टेलर यांनाही हे सांगितले आहे. यावेळी त्यांनी व्यवस्थापन स्तरावर बदलांचे संकेतही दिले होते. तेव्हापासून ट्विटरमधील अनेक कर्मचाऱ्यांना नोकरी गमवावी लागण्याची भीती निर्माण झाली आहे. पण, ट्विटरचे सीईओ पराग अग्रवाल म्हणाले की, सध्या असे काहीही होणार नाही. त्याचवेळी, असे देखील बोलले जात आहे की मस्क यांनी ट्विटरचा पुढील सीईओ कोण असेल हे आधीच ठरवले आहे.
पराग यांना काढण्यासाठी द्यावे लागतील $43 दशलक्ष
जॅक डोर्सीच्या जागी पराग अग्रवाल यांनी गेल्या वर्षी नोव्हेंबरमध्ये सीईओ म्हणून पदभार स्वीकारला होता. वृत्तानुसार, जोपर्यंत ट्विटरची विक्री प्रक्रिया पूर्ण होत नाही, तोपर्यंत पराग त्यांच्या भूमिकेत राहतील. तथापि, यापूर्वी असे वृत्त आले होते की पराग अग्रवाल यांना 12 महिन्यांत काढून टाकल्यास $ 43 दशलक्ष द्यावे लागतील.
विजया यांच्यावर खूश नाही मस्क
एलन मस्क ट्विटरच्या कायदेशीर प्रमुख विजया गाडे यांच्यावर खूश नसल्याच्या बातम्याही आल्या आहेत. ते त्यांनाही लवकरच काढून टाकू शकतात. वास्तविक, हा वाद अमेरिकेचे राष्ट्राध्यक्ष जो बायडन यांचा मुलगा हंटर बायडन यांच्याशी संबंधित आहे. विजया यांनी हंटरच्या लॅपटॉपवर केलेली एक विशेष कथा सेन्सॉर केली होती. यामुळे एलन मस्क यांनी त्यांना फटकारले आहे. मस्क यांनी याआधी ट्विट केले होते की, एका प्रमुख वृत्तसंस्थेची खरी बातमी प्रकाशित केल्याबद्दल त्यांचे ट्विटर खाते निलंबित करणे, हे अत्यंत चुकीचे पाऊल आहे.
ट्रम्प यांचे खातेही करण्यात आले होते ब्लॉक
विजया या त्याच अधिकारी आहेत ज्यांनी अमेरिकेचे माजी राष्ट्राध्यक्ष डोनाल्ड ट्रम्प यांचे ट्विटर अकाउंट ब्लॉक केले होते. ते आपल्या ट्विटद्वारे हिंसाचार पसरवू शकतात, अशी भीती व्यक्त केली जात होती. विजया यांचा जन्म भारतात झाला आहे आणि त्यांचे वडील मेक्सिकोतील रिफायनरीत केमिकल इंजिनीअर असल्यामुळे त्या त्यांच्यासोबत तिथे राहायला गेल्या. विजया यांचे शिक्षण टेक्सासमध्ये झाले. विजया यांनी नंतर न्यूयॉर्क लॉ स्कूलमध्ये कायद्याचे शिक्षण घेतले. 2011 पासून त्या या सोशल मीडिया साइटवर काम करत आहेत.