राज कुंद्राच्या अटकेनंतर शिल्पा शेट्टीने पहिल्यांदाच सोडले मौन


सोमवारी मुंबई पोलिसांच्या गुन्हे शाखेने अश्लील चित्रपट निर्मिती प्रकरणामध्ये अभिनेत्री शिल्पा शेट्टीचा पती आणि उद्योजक राज कुंद्रा याला अटक केल्यानंतर शिल्पा शेट्टीसंदर्भात बऱ्याच चर्चा झाल्या. पण आता राज याला अटक झाल्यानंतर शिल्पा पहिल्यांदाच इन्स्टाग्रामवरुन व्यक्त झाल्याचे पहायला मिळत आहे. कुंद्राच्या अटकेनंतर शिल्पाने प्रत्यक्षात समोर येऊन प्रसारमाध्यमांशी संवाद साधला नाही. तरीही शिल्पाचा या प्रकरणामध्ये काही सहभाग आहे का?, शिल्पाला याची कल्पना होती का? या आणि अशा बऱ्याच चर्चा रंगल्याचे चित्र पहायला मिळाले.

शिल्पाने सोमवारपासून कामाबरोबरच सोशल मीडियावरुनही ब्रेक घेतला होता. पण तिने गुरुवारी रात्री एक इन्स्टाग्राम स्टोरी पोस्ट केली. ज्यात तिने एका पुस्तकाच्या पानाचा फोटो शेअर केला आहे. यामध्ये जेम्स थर्बर या लेखकाचे एक वाक्य दिसून येत आहे. रागात मागे वळून पाहू नका किंवा घाबरुन येणाऱ्या काळाकडे पाहू नका उलट जागरुक राहून याकडे पाहा, असा या वाक्याचा अर्थ आहे.

आपल्याला ज्या लोकांनी दुखावले आहे, ज्यांनी आपल्याला निराशेच्या गर्तेत ढकलले, ज्यांच्यामुळे आपल्याला दुर्देव असल्यासारखे वाटले त्या लोकांच्या भूतकाळाकडे आपण रागाने वळून पाहतो. भविष्याकडे पाहतानाही आपण माझी नोकरी जाईल, मला एखादा आजार होईल किंवा जवळच्या एका व्यक्तीचे निधन होईल या भीतीमध्ये जगत असतो. आपण सध्याच्या वर्तमानामध्ये जगायला शिकले पाहिजे. काय घडले आणि काय घडणार याबद्दल विचार करण्याऐवजी आहे त्या वास्तवात जगले पाहिजे, असा या पोस्टमधील लेखकाच्या ओळींचा अर्थ आहे. मी जिवंत असल्याबद्दल स्वत:ला भाग्यवान समजतो आणि मोठा श्वास घेतो. मी भूतकाळामध्ये अनेक आव्हानांना तोंड दिले आहे आणि भविष्यातही देईन. माझे आजचे आयुष्य जगण्यापासून मला कोणीही विचलित करु शकत नसल्याचे या पोस्टच्या शेवटच्या ओळींमध्ये लिहिण्यात आले आहे.

शिल्पाने या पोस्टच्या माध्यमातून एकप्रकारे तिच्या मनाची परिस्थिती सांगण्याचा प्रयत्न केल्याचे दिसत आहे. अर्थात तिने पती राज कुंद्राला झालेल्या अटकेसंदर्भात किंवा एकंदरितच या प्रकरणासंदर्भात थेट कसलाही उल्लेख केलेला नाही. पण तिने येणारी सर्व आव्हान स्वीकारण्यास तयार असल्याचे संकेत या पोस्टमधून दिेले आहेत. या प्रकरणामध्ये शिल्पाचा काही सहभाग आहे का याचाही पोलीस तपास करत आहेत. सध्या तरी शिल्पाचा या प्रकरणामध्ये काही सहभाग असल्याचे दिसत नसल्याचे पोलिसांनी मंगळवारी घेतलेल्या पत्रकार परिषदेमध्ये स्पष्ट केले होते.