मुंबई – मुसळधार पावसाने कोकण आणि पश्चिम महाराष्ट्रात हाहाकार माजवलेला असतानाच गुरुवारी आपत्ती व्यवस्थापन यंत्रणा तसेच इतर संबंधित विभागांना सतर्क राहून बचाव कार्य करण्याचे निर्देश मुख्यमंत्री उद्धव ठाकरे यांनी दिले होते. त्याचप्रमाणे नद्यांच्या पातळीत सातत्याने वाढ होत असल्यामुळे या भागात राहणाऱ्या नागरिकांनी खबरदारी बाळगावी तसेच प्रशासनाला सहकार्य करावे, असे आवाहन केले होते. त्यानंतर शुक्रवारीही पावसामुळे परिस्थिती बिकट असल्याने मुख्यमंत्री स्वतः पूरस्थितीचा आढावा घेण्यासाठी मंत्रालयात दाखल झाले होते. त्यावेळी त्यांनी माध्यमांशी संवाद साधला.
मी गेल्या चार पाच दिवसांपासून आढावा घेत आहे. काही शब्दांची व्याख्या आपल्याला बदलावी लागणार आहे. अतिवृष्टीच्या पलिकडे जाऊन पाऊस कोसळत आहे. आपण या सगळ्या संकटाला सामोरे जात आहोत. पंतप्रधानांचा काल फोन आला होता. त्यांनी सहकार्याचं वचन दिले आहे, मदतकार्य आणि बचावकार्य सुरु असल्याचे मुख्यमंत्री उद्धव ठाकरे यांनी माध्यमांशी बोलताना सांगितले. जीवितहानी होऊ नये हा प्रयत्न असणार आहे. पुरात अडकलेल्यांना वाचवण्यावर व नदी परिसरातील नागरिकांच्या स्थलांतरावर भर देण्यात येत आहेत. डोंगर उतारावरील लोकांनी स्थलांतर करावे, असे मुख्यमंत्र्यांनी म्हटले आहे.
धरणे आणि नद्या ओसंडून वाहत आहे. धरणाचे पाणी काही ठिकाणी सोडावे लागत आहे. त्यानुसार नागरिकांना स्थलांतरित करण्याचे काम सुरु आहे. हे सगळे करत असताना कोरोनाचे संकट टळलेले नाही, हे लक्षात ठेवले पाहिजे. तळई येथे दरड कोसळल्यानंतर काही जणांना वाचवू शकलो. पण आता ३० ते ३५ लोक दुर्देवाने मृत्यूमुखी पडले आहेत. नागपुरातही अतिवृष्टी होत आहे. महाबळेश्वरातही जोरदार पाऊस सुरु असून याआधी कधी पडला नाही तेवढा पाऊस पडत आहे. परदेशातही अशा अतिवृष्टी आणि पुराच्या बातम्या आपण पाहत आहोत. सर्व मिळून संकटाला तोंड देत असल्याचे मुख्यमंत्री म्हणाले.
त्याचबरोबर जीवितहानी होऊ नये यासाठी प्राधान्य असणार आहे, असे उद्धव ठाकरे यांनी सांगितले. पुरात अडकलेल्यांना वाचवण्यावर व नदी परिसरातील नागरिकांच्या स्थलांतरावर भर देण्यात येत आहे. डोंगर उतारावरील लोकांनी स्थलांतर करावे लागणार आहे. त्याचवेळी लोकांनी प्रशासनाला सहकार्य करावे, असे मत उद्धव ठाकरेंनी यावेळी मांडले.