जाणून घ्या ही 5 योगासने केल्याने होणारे फायदे

नियमित योगासने करणे शारीरिक व मानसिक अनारोग्याचे निवारण व्हावे यासाठी गरजेचे असल्याचा सल्ला अनेक योगाभ्यासक देतात. आता रोग निवारणाच्या या पद्धतीला आंतरराष्ट्रीय मान्यताही मिळालेली आहे. २१ जून हा संयुक्त राष्ट्राने ‘आंतरराष्ट्रीय योग दिन’ साजरा करण्याच्या प्रस्तावाला मान्यता दिली आहे. हा प्रस्ताव भारताच्या नेतृत्वाखालील १७५ देशांच्या प्रतिनिधींकडून करण्यात आला होता. त्यातच आम्ही आज तुम्हाला योगातील काही योगासने सांगणार आहोत ज्यामुळे तुम्हाला फायदा देखील होणार आहे.

भुजंगासन हे त्यातील पहिले आसन आहे. शरीराचा आकार या आसनात सापासारखा होतो म्हणूनच या आसनाला भुजंगासन असे म्हटले जाते. यासाठी सर्वात आधी पोटावर झोपावे. दोन्ही पायांना जोडावे. हनुवटी जमिनीवर ठेवावी. आणि हळूहळू मान आणि पाठ वर उचलावी. नजर आकाशाकडे आणि हात ताठ ठेवावेत. या आसनामुळे गळा, पोट, पाठ, आणि कंबरेचा चांगला व्यायाम होतो. यामुळे आपल्या पित्ताशयाची क्रियात्मकता वाढते. पचन शक्ती वाढते. पोटावरची चरबीही कमी होते.

दुसरे आसन गोमुखासन असून यात उजव्या पायाची टांच शिवणीला लावा. दुसरा पाय त्यावरून गुडघ्यावर गुडघा येईल अशा त-हेने ठेवा. डावा हात वर करा आणि कोपऱ्यात वाकवून पाठिमागे घ्या तसेच डावे कोपरे डोक्यामागे वरच्या दिशेने राहील उजवा हात उजवीकडून पाठीमागे घ्या आणि तळहात वर सरकून दोन्ही हाताची बोटे एकमेकात घट्ट पकडा. या आसनामुळे खांदे, मान, दंडाच्या स्नायुंवर ताण पडल्याने बळकटी येते. मानेचे विकार आणि पाठदुखी थांबते. मन प्रसन्न आणि ताजेतवाने होते. एकाग्रता आणि मन:शांती लाभते.

तिसरे आसन शवासन असून यात दोन्ही पायात अंतर ठेऊन पाठीवर झोपा. दोन्ही हात शरीरापासून सहा इंच लांब आणि मोकळे ठेवावेत. मान सरळ आणि डोळे बंद ठेवावे. संपूर्ण शरीर सैल सोडून श्वासावर लक्ष केंद्रीत करा. या आसनामुळे मन शरीराशी जोडले गेलेले असते. त्यामुळे कोणत्याही प्रकारचे बाहेरचे विचार शरीरात उत्पन्न होत नाहीत. शरीराचा सगळा थकवा दूर होतो.

चौथे आसन उष्ट्रासन असून हे करताना शरीराची स्थिती ही उंटाच्या आकारासारखी होते. या आसनाला म्हणून उष्ट्रासन असे म्हणतात. सुरवातीला वज्रासनात बसा. त्यानंतर गुडघ्यांवर उभे राहा. सहाजिकच पाय मागे रहातील. दोन्ही हात कानाला लावून मागे घ्या. शरीराचा पुढील भाग हळूहळू मागे झुकवल्यानंतर हातही पूर्णपणे मागे न्या आणि दोन्ही हातांनी टाच पकडण्याचा प्रयत्न करा. मानही मागे वळवा आणि डोकेही मागे न्या. या आसनामुळे गुडघेदुखी, किडनी, लिव्हर, फुप्पुसे, मानेचा भाग यांना व्यायाम मिळतो. या आसनामुळे शरीरात स्फूर्ती निर्माण होते. या आसनामुळे पोटाचे आजार जसे बद्धकोष्ट, अपचन, एसिडिटी दूर होते.

पाचवे आसन आहे ताडासन. हे आसन करताना शरीराची स्थिती ताडीच्या झाडाप्रमाणे ताठ असते, त्यामुळे या आसनाला ताडासन असे म्हणतात. सरळ उभे राहून पायाची बोटे आणि पंजे समांतर ठेवून हात सरळ कमरेला लावून उभे राहावे. त्यानंतर हळू हळू हात खांद्यापर्यंत आणून त्यांना डोक्याच्यावर नेत केवळ तळ पायांवर उभे राहावे. हाताच्या पंज्यांना विरुद्ध दिशेने नेऊन वर ओढावे. या आसनामुळे पायांचे स्नायू आणि पंजे मजबूत होतात. छाती आणि पोट यांच्यावर ताण पडल्याने आजार दूर होतात. मुलांच्या शारीरिक वाढीसाठी महत्त्वपूर्ण आहे.