औरंगाबाद : सरकारी कामात अडथळा निर्माण केल्याप्रकरणी औरंगाबादमधील एमआयएमचे खासदार इम्तियाज जलील यांच्याविरोधात गुन्हा दाखल करण्यात आला आहे. कामगार उपायुक्त कार्यालयात जमलेल्या गर्दीचे कर्तव्य म्हणून चित्रीकरण करणाऱ्या पोलीस कर्मचाऱ्याच्या हाताला इम्तियाज जलील यांनी फटका मारला.
एका दुकानावर लॉकडाऊनच्या नियमांचे उल्लंघन केल्यामुळे कारवाई करण्यात आली होती. या खासदार इम्तियाज जलील हे दुकानाचे सील काढण्यासाठी व्यापाऱ्यांसोबत कामगार उपायुक्तांच्या कार्यालयात गेले होते. त्यावेळी कामगार उपायुक्त कार्यालयातील जमलेल्या जमावाचे कर्तव्य म्हणून चित्रीकरण करणाऱ्या महिला कर्मचाऱ्याचा मोबाईल खाली पाडण्यासाठी इम्तियाज जलील यांनी त्यांच्या हातावर फटका मारला. महिला कर्मचाऱ्याने घडलेल्या घटनेची माहिती वरिष्ठांना दिली.
मागील अनेक दिवसांपासून औरंगाबादमधील अनेक दुकाने लॉकडाऊनच्या नियमांचं उल्लंघन केल्यामुळे सील करण्यात आली आहेत. शिवाय या दुकानांना दंडही ठोठावण्यात आला आहे. परंतु छोट्या व्यापाऱ्यांना हा दंड व्यापाऱ्यांना भरणे शक्य नसल्यामुळे त्यांना आपली दुकाने सुरु करता येत नाहीत. याच कारणामुळे इम्तियाज जलील कामगार कार्यालयात गेले होते. यावेळी त्यांनी कामगार उपायुक्त शैलेंद्र पोळ यांना जाब विचारला.
महिला पोलीस कर्मचारी कार्यालयात जमलेल्या गर्दीचे चित्रीकरण करताना इम्तियाज जलील चांगलेच संतापले. आम्ही येथे मनोरंजनासाठी चित्रपट पाहायला आलेलो नाही, जमत नसेल तर बाहेर उभे राहा, अशा शब्दात जलील यांनी पोलीस कर्मचाऱ्यांना सुनावले आणि कर्मचाऱ्याच्या हातावर फटका मारला. त्यानंतर इम्तियाज जलील यांच्यासह इतर 24 दुकानदारांच्या विरोधातही गुन्हा दाखल झाला आहे. इम्तियाज जलील आणि 24 व्यापाऱ्यांविरोधात आयपीसीच्या कलम 353, 332, 188, 269 अंतर्गत गुन्हा दाखल करण्यात आला आहे.