अमेरिकेच्या एका माजी गुप्तहेराने फॉक्स न्यूजच्या लाईव टीव्ही कार्यक्रमात एक धक्कादायक खुलासा केला आहे. पॅट ब्रोसनन असे त्यांचे नाव असून अमेरिकेत कोविड १९ लसीकरण पूर्ण झाले की सार्वत्रिक गोळीबार म्हणजे मास शुटींगच्या घटनात प्रचंड वाढ होईल असा तर्क केला आहे. कॅलिफोर्नियातील सॅन जोसे येथे नुकत्याच केल्या गेलेल्या अंदाधुंद गोळीबारात हल्लेखोरासह ९ जणांचा जीव गेल्याच्या घटनेनंतर पॅट लाईव्ह टीव्ही मध्ये बोलत होते. करोना लसीकरण आणि सार्वत्रिक गोळीबार यांच्या संदर्भात बोलताना ते म्हणाले, सध्या हे हल्लेखोर करोनाच्या भीतीने घरात लपून आहेत. पण एकदा लसीकरण झाले की ते घराबाहेर येतील आणि निरपराध लोकांचे अंदाधुंद गोळीबार करून जीव घेतील. पॅट म्हणाले, माझा हा दावा खोटा ठरावा अशीच माझी इच्छा आहे पण असे होणार नाही.
सर्व नागरिकांचे लसीकरण झाले की नागरिक मोठ्या संखेने रस्त्यावर येतील. गर्दी वाढेल आणि मग उगीचच काहीही कारण नसताना गोळीबार करत सुटणाऱ्या भित्रटाना ऊत येईल. कोणतीही सूचना न देता ते गोळीबार करत सुटतील.
अमेरिकेत एपी, युएसए टुडे, नॉर्थ ईस्ट युनिव्हर्सिटी अश्या सार्वत्रिक गोळीबार घटनेचा डेटा ठेवते. २०२० मध्ये अश्या चार घटना घडल्या. या वर्षात मात्र आत्ताच १२ पेक्षा अधिक घटना घडल्या आहेत. गतवर्षी गोळीबारात २० हजाराहून अधिक लोक मारले गेले. कोणतेही कारण नसताना गर्दीत घुसून गोळीबार करणे याला मास शुटींग असे म्हणते जाते.