बीड : कोरोनाबाधितांच्या वाढत्या संख्येला आळा बसावा याकरिता बीड जिल्ह्यामध्ये पुन्हा एकदा कडक लॉकडाऊनची घोषणा करण्यात आली आहे. उद्या म्हणजे गुरुवारी (25 मार्च) रात्री बारा वाजल्यापासून 4 एप्रिलच्या बारा वाजेपर्यंत हा लॉकडाऊन असणार आहे. जिल्ह्यातील पूर्ण वाहतूक व्यवस्था या दरम्यान बंद असेल अत्यावश्यक सेवा जरी चालू असल्या तरी किराणा दुकाने मात्र सकाळी 7 ते 9 या दोन तासाच्या वेळेमध्ये सुरू असतील तेही सोशल डिस्टन्सिंगचे पालन करुन सुरु ठेवावीत असे आदेश बीडचे जिल्हाधिकारी रवींद्र जगताप यांनी दिले आहेत.
या दरम्यान काय बंद असणार?
- उपहारगृह, सर्व रेस्टॉरंट, लॉज, हॉटेल्स, मॉल बाजार, मार्केट संपूर्णतः बंद राहतील.
- जिल्ह्यातील सर्व सलून, ब्यूटी पार्लर दुकाने संपूर्णतः: बद राहतील.
- शाळा, महाविद्यालय, शैक्षणिक संस्था, प्रशिक्षण संस्था, सर्व प्रकारचे शिकवणी वर्ग संपूर्णतः बंद राहतील.
- सार्वजनिक व खाजगी प्रवासी वाहने दोन चाकी, तीन चाकी व चार चाकी संपूर्णतः बंद राहतील.
- अत्यावश्यक सेवेतील वाहने, पूर्व परवानगी प्राप्त वाहने व वैद्यकिय कारणास्तव प्रवासासाठी खाजगी वाहनाचा वापर करता येणार आहे. सोबत ओळखपत्र बाळगणे आवश्यक आहे.
- सार्वजनिक व खाजगी बस सेवा, ट्रक, टेम्पो, ट्रेलर ट्रॅक्टर इत्यादी संपूर्णतःः बंद राहतील.
- सर्व प्रकारचे बांधकामे संपूर्णतःः बंद राहतील मात्र शासकीय बांधकामे चालू राहतील. त्या ठिकाणी काम करणा-या कर्मचाऱ्यांना पास देण्यात येतील.
- सर्व चित्रपटगृह, व्यायामशाळा, जलतरण तलाव, नाट्यगृह संपूर्णतः बंद राहतील
- मंगल कार्यालय, हॉल, स्वागत समारंभ संपूर्णतः बंद राहतील
- सामाजिक, राजकीय, क्रीडा, मनोरंजन सांस्कृतिक धार्मिक कार्यक्रम व सभा संपूर्णतःः बंद राहतील
- धार्मिक स्थळ/सार्वजनिक प्रार्थनास्थळे संपूर्णतः: बंद राहतील
- बीड जिल्ह्यातील सर्व खाजगी कार्यालये संपूर्णतः बंद राहतील. परंतु 31 मार्च 2021 अखेरीस बँकेत चलन भरण्याची कामे करण्यास परवानगी असेल.
- कामे करण्यास जास्तीत जास्त तीन व्यक्तीस परवानगी असेल.
- या कालावधीत Morning Walk व Evening Walk प्रतिबंधित राहतील.
ही आस्थापने असतील सुरू
- सकाळी 7 ते 9 वाजेपर्वत सर्व किराणा दुकानाची ठोक विक्रेते सुरु राहतील. 7 ते 9 या वेळेतच केवळ किरकोळ विक्रेत्यांना दुकानातून घरपोच किराणा मालाचा पुरवठा करता येईल. त्यादरम्यान सामाजिक अंतर व मास्क वापरणे बंधनकारक राहील
- सकाळी 10 वाजेपर्यंत दुध विक्री व वितरण घरपोच राहील. तथापि दूध संकलन नेहमीप्रमाणे विहीत वेळेनुसार सुरु ठेवता येईल. त्यादरम्यान सामाजिक अंतर व मास्क वापरणे बंधनकारक राहील. संबंधित दूध विक्रेता व वितरक यांनी अॅंटीजन आरटीपीसीआर चाचणी केलेली असणे बंधनकारक असेल.
- सकाळी 7 ते 10 या वेळेत किरकोळ विक्रेत्यांना भाजीपाला व फळांची विक्री करता येईल. त्यादरम्यान सामाजिक अंतर व मास्क वापरणे बंधनकारक राहील. किरकोळ विक्रेते एका ठिकाणी न थांबता मास्क लावून गल्लोगल्ली फिरुन सकाळी 7 ते 12 या वेळेतच विक्री करतील.
- आपल्या नियमित वेळेनुसार सर्व खाजगी व सार्वजनिक वैद्यकिय सेवा पशुचिकित्सा सेवा सुरु राहतील. तसेच आपल्या नियमित वेळेनुसार सर्व रुग्णालये व रुग्णालयाशी निगडीत सेवा आस्थापना सुरु राहतील व कोणतेही रुग्णालय लॉकडाऊनचा आधार घेऊन रुग्णांना आवश्यक सेवा नाकरणार नाही. अन्यथा संबंधित व्यक्ती अथवा संस्थेवर कारवाई करण्यात येईल.
- 4 एप्रिलपर्यंत ऑनलाईन औषध वितरण सेवा व दवाखान्याशी संलग्न असलेली सर्व दुकाने 24 तास सुरु ठेवता येतील.
- बीड शहरातील पोलीस पेट्रोल पंप, नगर रोड, बीड, साई पेट्रोल पंप, बार्शी रोड, बीड हा पेट्रोल पंप 24 तास चालू राहील.