रायगड : स्वराज्याची राजधानी असलेल्या रायगडावर दरवर्षी एकच धून… सहा जून… या जयघोषात शिवराज्याभिषेक सोहळा साजरा केला जातो. पण यंदा कोरोनामुळे रायगडावर शिवप्रेमी पोहोचू शकले नसले तरी दुर्गराज रायगडावर दरवर्षीच्या परंपरेप्रमाणे शिवराज्याभिषेक सोहळ्याला सुरुवात झाल्याची माहिती खासदार छत्रपती संभाजीराजे यांनी दिली आहे.
३४७ व्या शिवराज्याभिषेक दिनाच्या सर्व शिवभक्तांना खुप खुप शुभेच्छा..
दुर्गराज रायगडावर शिवराज्याभिषेक कार्यक्रमांची सुरुवात झाली आहे.६ जून २०२०
छत्रपती शिवाजी महाराज मनामनात,
राज्याभिषेक घराघरात! pic.twitter.com/JtdBkQFsG7— Sambhaji Chhatrapati (@YuvrajSambhaji) June 6, 2020
छत्रपती शिवाजी महाराजांचा 6 जून 1664 ला राज्याभिषेक झाला होता. दरवर्षी यानिमित्ताने शिवराज्याभिषेक दिन साजरा केला जातो. दरवर्षी सहा जूनला अखिल भारतीय राज्याभिषेक समितीच्या वतीने दुर्गराज रायगडावर हा सोहळा संपन्न होतो. या निमित्ताने देशभरातून हजारो शिवभक्त रायगडावर दाखल होतात. विविध उपक्रमांचे समितीचे मार्गदर्शक व शिवछत्रपतींचे वंशज श्रीमंत युवराज संभाजीराजे छत्रपती, युवराज शहाजीराजे छत्रपती यांच्या प्रमुख उपस्थितीत आयोजन केले जाते. पण या सोहळ्यावर यंदा कोरोनाचे संकट असल्यामुळे यंदाचा शिवराज्याभिषेक घरीच राहुन साजरा करण्याचे आवाहन संभाजीराजे छत्रपती यांनी केले आहे.
आज फेसबुकच्या माध्यमातून खासदार छत्रपती संभाजीराजे यांनी म्हटले आहे की, तोच जोश, तोच उत्साह, तोच क्षण पुन्हा अनुभवायचा आहे, पण आपल्या गडातून म्हणजे आपल्याच घरातून. शिवराज्याभिषेक सोहळ्याची दरवर्षीची रायगडावरील लगबग तुम्ही सर्वजण सकाळी पाहण्यासाठी आतुर असाल म्हणूनच सकाळी 9 वाजता गतवर्षीचा शिवराज्याभिषेक सोहळा दाखवला जाणार आहे. मी समजू शकतो मी केलेल्या आवाहनाला तुम्ही सर्वांनी प्रतिसाद दिला आहे. सध्या दोन दिवस कोकणात चक्री वादळाने थैमान घातले असून रायगड जिल्ह्यातील वीज पुरवठा खंडित झालेला आहे. मोबाईल टॉवर सुद्धा पडले आहेत. परिसरात रेंज कमी प्रमाणात असल्याने तुम्हाला सोहळा दाखवण्यासाठी आम्ही जास्तीत जास्त प्रयत्न करत आहोत. पण माझा शब्द आहे 6 जून 2020 शिवराज्याभिषेक सोहळा तुम्ही घरातून नक्की पहाल, असेही त्यांनी म्हटले आहे.
2008 ला शिवभक्तांच्या सहकार्याने मेघडंबरीत शिवछत्रपतींच्या पुतळ्याची प्रतिष्ठापना झाली. शिवभक्तांचा गडावरील उपस्थितीचा आलेख दरवर्षी उंचावत आहे. शिवराज्याभिषेक सोहळ्याला लोकोत्सवाचे स्वरुप प्राप्त झाले आहे. देशभरातूनच नव्हे तर जगभरातून शिवभक्त रायगडावरील हा ऐतिहासिक सोहळा पाहण्यासाठी आणि त्याचा साक्षीदार होण्यासाठी आतुर झालेले असतात. हा ऐतिहासिक सोहळा यंदाही मोठ्या प्रमाणावर साजरा करण्याचे ठरवले होते. सोहळ्याबाबत समितीचे पदाधिकारी व शिवभक्तांनी चर्चा करून जगभर पसरलेल्या कोरोना महामारीचे संकट पाहता समाजहीत डोळ्यासमोर ठेवून सोहळा अत्यंत मोजक्या लोकांच्या उपस्थितीत साजरा करण्याचे नियोजन केले आहे. सोहळा साधेपणाने साजरा होणार आहे.
दरम्यान युवराज संभाजीराजे छत्रपती यांनी यावर्षीचा शिवराज्याभिषेक घरात राहूनच विविध उपक्रमांनी साजरा करावा. स्वराज्याचे प्रतिक भगवा ध्वज घरासमोर लावावा, शिवछत्रपतींच्या प्रतिमेचे पूजन करावे, स्वदेशी जातीचे एखादे झाड लावून त्याचे संगोपन करण्याचा संकल्प करावा, शिवरायांवरील पुस्तकांचे वाचन करावे. पण कोणत्याही परिस्थितीत रायगडावर येण्याचा प्रयत्न करु नये, अशी विनंती केली आहे.
दरम्यान 10 मे रोजी छत्रपती संभाजीराजे यांनी फेसबुकवर एक पोस्ट लिहिली होती. यात सर्व शिवभक्तांना मी एकच शब्द देतो, की महाराजांचा राज्याभिषेक विधिवत पार पाडला जाईल. त्या परंपरेमध्ये खंड पडू देणार नाही. राजसदरेतील राज्याभिषेक सोहळा सर्व शिवभक्तांना थेट पाहता येईल याविषयी सुद्धा उपाय योजना करण्याचा माझा मानस आहे, असे त्यांनी म्हटले आहे. आज लिहिलेल्या पोस्टमध्ये देखील त्यांनी म्हटले आहे की, सध्या दोन दिवस कोकणात चक्री वादळाने थैमान घातले असून रायगड जिल्ह्यातील वीज पुरवठा खंडित झालेला आहे. मोबाईल टॉवर सुद्धा पडले आहेत. परिसरात रेंज कमी प्रमाणात असल्याने तुम्हाला सोहळा दाखवण्यासाठी आम्ही जास्तीत जास्त प्रयत्न करत आहोत. पण माझा शब्द आहे 6 जून 2020 शिवराज्याभिषेक सोहळा तुम्ही घरातून नक्की पहाल, असेही त्यांनी म्हटले आहे.