अमृतसर – पंजाब सरकारने कोरोनाचा प्रादुर्भाव रोखण्यासाठी सार्वजनिक वाहतूक बंद करण्याचा निर्णय घेतला आहे. सरकारकडून बस, ऑटो रिक्षा आणि टेम्पो यांच्या वाहतुकीवर बंदी घालण्यात आली आहे. या निर्णयाची अंमलबजावणी शुक्रवार मध्यरात्रीपासून केली जाणार आहे. राज्यातील जे लोक बाहेर किंवा अन्य ठिकाणी आहेत त्यांना लवकरात लवकर आपल्या घरी पोहोचण्यासाठी उद्यापर्यंतची वेळ देण्यात आली आहे. आज तयारीच्या आढावा बैठकीत पंजाब सरकारने हा निर्णय़ घेतला.
दरम्यान लोकांची कोणत्याही ठिकाणी गर्दी होऊ नये यासाठी २० हून जास्त लोकांनी एकत्र येण्यावर निर्बंध आणले आहेत. हा आकडा आधी ५० ठेवण्यात आला होता. आतापर्यंत पंजाबमध्ये कोरोनाची दोन प्रकरणे समोर आली आहे. जर्मनी आणि इटलीचा प्रवास केलेल्या एका व्यक्तीला कोरोनाची लागण झाल्याचे समोर आले होते. त्याचा बुधवारी मृत्यू झाला. तर चंदीगडमध्ये कोरोनाची लागण झाल्याचा पहिली रुग्ण सापडला होता.
दरम्यान अटारी सीमारेषेवरुन अमृतसरमध्ये ४३ भारतीय दाखल झाले असून त्यांना विलगीकरण कक्षात ठेवण्यात आले आहे. यापैकी २९ जणांनी दुबईला प्रवास केलेला असून १४ जण पाकिस्तानात शिक्षण घेत आहे. त्यांचे वैद्यकीय अहवाल राज्य सरकारला पाठवण्यात आल्याची माहिती सिव्हिल सर्जन परिजीत कौर यांनी दिली आहे.