या दलबदुल उमेदवारांना जनतेने सपशेल नाकारले


मुंबई : लोकसभा निवडणुकीत राज्यातील मतदारांनी महायुतीच्या बाजूने कौल दिला होता. तसेच युतीच्या बाजूने राज्यभरात लाट होती. काँग्रेस आणि राष्ट्रवादी काँग्रेसमधील तब्बल 35 नेत्यांनी या लाटेचा फायदा घेण्यासाठी स्वत:च्या पक्षाला सोडचिठ्ठी देत शिवसेना आणि भारतीय जनता पक्षाचा आश्रय घेतला. दोन्ही पक्षांनी या 35 नेत्यांना विधानसभेची उमेदवारी दिली होती. पण या 35 नेत्यांपैकी 19 उमेदवारांचा पराभव झाला असून दलबदलू नेत्यांना महाराष्ट्राच्या जनतेने सपशेल नाकारल्याचे चित्र पाहायला मिळत आहे.

आपला पक्ष सोडून शिवसेनेत दाखल झालेले आयाराम पराभूत

  1. राष्ट्रवादीतून शिवसेनेत आलेल्या दिलीप सोपल यांचा पराभव झाला आहे. अपक्ष लढणाऱ्या राजेंद्र राऊत यांनी सोपल यांचा पराभव केला आहे.
  2. राष्ट्रवादीतून शिवसेनेत आलेल्या जयदत्त क्षीरसागर यांचा पराभव झाला आहे. राष्ट्रवादीच्या संदीप क्षीरसागर यांनी जयदत्त क्षीरसागर यांचा पराभव केला आहे.
  3. काँग्रेसमधून शिवसेनेत आलेल्या भाऊसाहेब कांबळे यांचा श्रीरामपूर मतदारसंघात पराभव झाला आहे.
  4. राष्ट्रवादीतून शिवसेनेत आलेल्या रश्मी बागल यांचा करमाळा मतदारसंघात पराभव झाला आहे.
  5. राष्ट्रवादीतून शिवसेनेत आलेल्या शेखर गोरे यांचा माण-खटाव मतदारसंघातून पराभव झाला आहे.
  6. शिवसेनेत आलेल्या विजय पाटील यांचा वसई मतदारसंघात पराभव झाला आहे.
  7. माजी पोलिस अधिकारी प्रदीप शर्मा शिवसेनेच्या तिकीटावर नालासोपारा मतदारसंघातून निवडणूक लढवत होते. परंतु त्यांचा पराभव झाला आहे.
  8. शिवसेनेत आलेल्या संजय कोकाटे यांचा माढा मतदारसंघात पराभव झाला आहे.
  9. काँग्रेसमधून शिवसेनेत आलेल्या दिलीप माने यांचा सोलापूर मध्य मतदारसंघात पराभव झाला आहे.
  10. शिवसेनेत आलेल्या नागनाथ क्षीरसागर यांचा मोहोळ मतदारसंघात पराभव झाला आहे.
  11. काँग्रेसमधून शिवसेनेत आलेल्या निर्मला गावित यांचा इगतपुरी मतदारसंघात पराभव झाला आहे.

आपला पक्ष सोडून भाजपत दाखल झालेले आयाराम पराभूत

  1. काँग्रेसमधून भाजपमध्ये आलेल्या हर्षवर्धन पाटील यांचा इंदापूर मतदारसंघात पराभव झाला आहे.
  2. राष्ट्रवादीतून भाजपमध्ये आलेल्या वैभव पिचड यांचा अकोले मतदारसंघात पराभव झाला आहे.
  3. वंचित बहुजन आघाडीमधून भाजपमध्ये आलेल्या गोपिचंद पडळकर यांचा बारामती मतदारसंघात पराभव झाला आहे.
  4. काँग्रेसमधून भाजपमध्ये आलेल्या गोपालदास अग्रवाल यांचा गोंदिया मतदारसंघात पराभव झाला आहे.
  5. काँग्रेसमधून भाजपमध्ये आलेल्या धैर्यशील कदम यांचा कराड उत्तर मतदारसंघातून पराभव झाला आहे.
  6. भाजपमध्ये आलेल्या रमेश आडसकर यांचा माजलगावमधून पराभव झाला आहे.
  7. भाजपच्या भरत गावित यांचा नवापूर मतदारसंघातून पराभव झाला आहे.
  8. सातारा लोकसभा पोटनिवडणुकीत राष्ट्रवादीतून भाजपमध्ये आलेल्या उदयनराजे भोसले यांच्या पराभव झाला आहे.

Leave a Comment