मुंबई – पेट्रोल आणि डिझेलवरील मूल्यवर्धीत कर (व्हॅट) केंद्र सरकारपाठोपाठ आता राज्य सरकारनेही कमी केल्यामुळे पेट्रोल प्रतिलिटर २ रुपये तर डिझेल प्रति लिटर १ रुपयांनी स्वस्त होणार आहे. हे नवे दर मध्यरात्रीपासून लागू होणार आहे.
देशभरात पेट्रोल आणि डिझेलचे दर वाढल्याने संतापाचा आगडोंब उसळला होता. हा आगडोंब शमविण्यासाठी केंद्र सरकारने पेट्रोल आणि डिझेलवरील कर कमी केला होता. पेट्रोल- डिझेलवरील कर राज्य सरकारनेही कमी करावे, असे आवाहन केंद्र सरकारने केले होते.
राज्य सरकारनेही मंगळवारी पेट्रोल- डिझेलवरील व्हॅट कमी करण्याचा निर्णय घेतला. व्हॅट कमी करण्याचा निर्णय मंत्रिमंडळाच्या बैठकीत घेण्यात आला आहे. दिवाळीच्या तोंडावर पेट्रोल-डिझेलचे दर कमी झाल्याने सर्वसामान्यांना दिलासा मिळेल अशी आशा आहे. आज (मंगळवारी) मध्यरात्रीपासून नवे दर लागू होतील. पेट्रोल लिटरमागे २ तर डिझेल लिटरमागे १ रुपयांनी स्वस्त होणार आहे.