कर्नाटकातील सीडी कांड

मेती यांच्या राजीनाम्याला एक राजकीय कड आहे. मेती हे मुख्यमंत्री सिद्रामय्या यांचे निकटचे सहकारी आहेत. ते ७१ वर्षांचे असून कॉंग्रेसचे ज्येष्ठ कार्यकर्ते म्हणून त्यांना मान दिला जातो. धनगर समाजातले ते एकमेव मंत्री आहेत. त्यामुळे त्यांच्या राजीनाम्याने या समाजात मोठी नाराजी निर्माण होण्याची शक्यता आहे. मेती यांनी राजीनामा देताना आपल्या विरोधातली कसली तरी सीडी तयार असल्याचे सांगितले जात असले तरी अशी कसलीही सीडी तयार नाही असे ठामपणे म्हटले आहे. माहितीच्या आधिकारात काम करणारे कार्यकर्ते राजशेखर मळोली यांनी मात्र ही सीडी तयार असल्याचे ठामपणे म्हटले आहे. एका वृत्तवाहिनीवर ही कथित सीडी लावण्यातही आली. मात्र तिची विश्‍वासार्हता कमी होणारा एक प्रकार घडला.

या प्रकरणात ज्या महिलेचे नाव घेण्यात येत आहे तिच्याशी या वृत्तवाहिनीच्या पत्रकारांनी संपर्क साधला आणि तिची मुलाखत घेऊन या सीडीसोबतच तिचे प्रसारणही केले. त्यात मात्र ही महिला मंत्र्यावरचे आरोप खोटे असल्याचे सांगताना दिसते. ती पत्रकारांवर भडकली आणि तिने पत्रकारांना झापले. श्री. मेती हे आपले नातेवाईक आहेत आणि त्यांच्या वयाचा तरी विचार पत्रकारांनी करायला हवा होता असे ती म्हणाली. आपण मेती यांना चांगले ओळखतो. त्यांच्याकडून असा प्रकार घडणारच नाही असे तिने ठामपणे सांगितले. या कथित सीडीच्या विश्‍वासार्हतेवर मोठेच प्रश्‍नचिन्ह निर्माण झाले आहे. ही सीडी तयार करणारे कार्यकर्ते श्री. राजशेखर मळोली यांनी मात्र अशी सीडी असल्याचे तर म्हटले आहेच पण अशाच प्रकारच्या चित्रफिती आपल्याकडे असल्याचा दावा केला आहे. ज्यामध्ये अजून एक मंत्री आणि तीन आमदार गुंतले आहेत, असे त्यांचे म्हणणे आहे.