नवी दिल्ली: आता इंग्रजी बरोबरच हिंदी आणि अन्य भारतीय भाषांमध्ये ई मेल आयडी उपलब्ध करून देण्यासाठी केंद्र सरकारने पुढाकार घेतला आहे. त्यामुळे गूगल, मायक्रोसॉफ्ट आणि भारतीय कंपनी रेडीफ अशा कंपन्या ही सुविधा लवकरच उपलब्ध करून देतील.
देशभरातील ग्रामीण भागातही आता इंटरनेट सुविधा उपलब्ध आहेत. त्यामुळे ग्रामीण अल्पशिक्षित जनतेलाही संपर्काची ई मेलसारखी साधने उपलब्ध व्हावी; यासाठी भारतीय भाषांमधून ई मेल आयडी उपलब्ध करून देण्यात यावे; अशी सूचना केंद्राने सर्व सेवा पुरवठादार कंपन्यांच्या बैठकीत केली आहे.
‘भारत नेट प्रोजेक्ट’ अंतर्गत लवकरच देशातील अडीच लाख ग्रामपंचायती ‘हाय स्पीड इंटरनेट’ने जोडल्या जाणार आहेत. त्यावेळी ग्रामपंचायतीच्या कर्मचाऱ्यांना व पदाधिकाऱ्यांना ही सुविधा वापरणे सुलभ व्हावे यासाठी अशा सुविधा आवश्यक आहे; असे मत माहिती तंत्रज्ञान आणि इलेक्ट्रॉनिक्स मंत्रालयाचे संयुक्त सचिव राजीव बन्सल यांनी व्यक्त केले. देशात मोठ्या प्रमाणात असे नागरिक आहेत; की ज्यांना इंग्रजी वाचता अथवा टाईप करता येत नाही. त्यामुळे इंटरनेट सुविधा सक्षमपणे वापरण्यासाठी त्यांना त्यांच्या मातृभाषेतील ई मेल आयडी मिळणे आवश्यक आहे; असे ते म्हणाले.
भारतीय भाषेतून ई मेल आयडी उपलब्ध करून देण्याबाबत गूगल, मायक्रोसॉफ्ट आणि रेडीफच्या प्रतिनिधींनी अनुकूलता व्यक्त केली. मात्र सरकारने ही सेवा अनिवार्य करण्यापेक्षा कंपन्यांना या सुविधा देण्यास प्रोत्साहन द्यावे; अशी अपेक्षा त्यांनी व्यक्त केली.