मुंबई- पक्षाध्यक्ष सोनिया गांधी यांना भेटण्यासाठी उद्योगमंत्री नारायण राणे आज दिल्लीला रवाना झाले. ही भेट आज सायंकाळी होणार असल्याचे कळते. राणेंचे या भेटीत फक्त म्हणणे ऐकून घेतले जाईल. मात्र त्यांना कोणतेही आश्वासन दिले जाणार नाही. राणेंनी बंड थंड केल्याचे संकेत दिले असले तरी त्यांनी हा विषय प्रतिष्ठेचा करीत आपली नाचक्की होऊ नये म्हणूनच सोनियांची भेट घेत आहेत. मात्र राणे उघडे पडल्याचे स्पष्ट झाले आहे.
दोन दिवसापूर्वी राणे यांनी मुख्यमंत्री चव्हाण यांची वर्षावर भेट घेऊन दोन तास चर्चा केली होती. तसेच राणेंच्या कोणत्या अडचणी आहेत याची माहिती घेतली होती. यावेळी प्रदेशाध्यक्ष माणिकराव ठाकरेही उपस्थित होते. त्यानंतर राणेंनी माणिकराव ठाकरे व चव्हाण आम्ही तिघे सोनियांना भेटणार असल्याचे माध्यमांना सांगितले होते. मात्र, आज राणे एकटेच दिल्लीला गेल्याचे दिसून येत आहे. यावरून राणेंचे बंड थंड होणार असल्याचे स्पष्ट होतच आहे. याचबरोबर काँग्रेसने त्यांना कोणतेही अवास्तव महत्त्व न देण्याची भूमिका कायम ठेवली आहे. मुख्यमंत्री चव्हाण यांनी राणेंच्या भूमिकेकडे दुर्लक्ष केले आहे. त्यामुळे राणेंना आपले बंड थंड करण्यावाचून पर्याय नाही. बुधवारी प्रदेशाध्यक्ष ठाकरेंनी राणे काँग्रेस पक्षातच राहतील व कदाचित राजीनामाही मागे घेतील असे संकेत दिले होते.