नवी दिल्ली – क्रिकेटविश्वात क्रिकेटचा देव म्हणून ओळखला जाणाऱ्या सचिन तेंडूलकरच्या निवृत्तीचा क्षण त्याच्या चाहत्यांसाठी दु:खद क्षण ठरला होता. सचिनच्या फलंदाजीचे जगातील अनेक प्रसिद्ध व्यक्ती, खेळाडू, कलाकार निस्सीम चाहते आहेत. मात्र टेनिसची स्टार खेळाडू मारिया शारापोवाने आपल्याला सचिन तेंडूलकर नावाची व्यक्तीच माहित नसल्याचे सांगून अनेकांना धक्का दिला आहे. मास्टर-ब्लास्टर सचिन तेंडुलकर टेनिसचा चाहता असून, टेनिस सामन्यांचा आनंद सचिनने अनेकदा मैदानावर प्रेक्षकांमध्ये उपस्थित राहून लुटत असतो. यंदाच्या विम्बल्डन स्पर्धेतील एका सामन्यासाठी इंग्लंडचा माजी फुटबॉलपटू डेव्हिड बेकहॅम याच्यासह सचिन तेंडुलकर मैदानावरील रॉयल बॉक्समध्ये उपस्थित होता. सामन्यानंतरच्या पत्रकारपरिषदेत मारिया शारापोव्हाला या प्रसिद्ध व्यक्तींच्या उपस्थितीबद्दल विचारण्यात आले असता, मला त्यावेळी डेव्हिड बेकहॅम सोडून रॉयल बॉक्समध्ये उपस्थित असणाऱ्या अन्य व्यक्तींबद्दल माहिती नसल्याचे शारापोव्हाने सांगितले. त्यावेळी सचिनबद्दल शारापोव्हाला आठवण करून दिल्यानंतर, सचिन तेंडुलकर हे नावच आपण कधी ऐकले नसल्याचे मारियाने सांगितल्याने अनेकांना आश्चर्याचा धक्काच बसला.