‘सीएम’पदावरून भाजपमध्ये गटबाजी !

विधानसभा निवडणुकीत शिवसेना ही अधिक जागा लढवते, मात्र यंदा नरेंद्र मोदींच्या करिष्यामुळे भाजपकडून अधिक जागांवर दावा केला जात आहे. मुख्यमंत्रिपदावरुनही खलबते सुरु आहेत. देशाप्रमाणेच राज्यातही चेहरा दिल्यास निवडणुकीतील यश आणखी वाढेल, असाही एक मतप्रवाह आहे.त्यातूनच ‘देशात नरेंद्र ,राज्यात देवेंद्र ‘हा प्रचार सुरु झाला आहे,त्यात शिवसेनेने मुख्यमंत्रीपदावर आधीच दावा ठोकलेला असला तरी खुद्द पक्षप्रमुख उद्धव ठाकरे यांनीही तशी इच्छा व्यक्त केली आहे. या पार्श्वभूमीवर भाजपमध्ये सुरु असलेल्या प्रचाराला लगाम घालण्याचे प्रयत्न सुरु झाले आहेत. विधानसभेची निवडणूक गोपीनाथ मुंडे यांच्या नेतृत्त्वाखाली लढवू. मात्र मुख्यमंत्रिपदाचा उमेदवार नंतरच निवडला जाईल असे विधानपरिषदेचे विरोधी पक्षनेते विनोद तावडे यांनी स्पष्ट केले आहे .

एका गटाकडून राज्यात देवेंद्र फडणवीस यांचे नांव मुख्यमंत्रीपदासाठी चर्चेत आणले जात आहे. यासंदर्भात तावडे म्हणाले, राज्यात विधानसभा निवडणुकीसाठी मुंडे यांच्याकडेच नेतृत्व असेल. तर मुख्यमंत्रीपदाचा कोणताही उमेदवार निवडणुकीपूर्वी भाजपकडून जाहीर करण्यात येणार नाही. शिवसेना भाजप महायुतीत मुख्यमंत्रीपदाबाबतचे धोरण ठरलेले आहे. त्यामुळे भाजपचे जास्त आमदार निवडून आले तर पक्षाचे केंद्रीय संसदीय मंडळ निर्णय करेल.मुख्यमंत्री हा महायुतीचा होईल. तसेच अडीच -अडीच वर्षे मुख्यमंत्रीपद वाटून घेण्याबाबतचा पर्याय असू शकतो. असेही ते म्हणाले.