उस्मानाबाद – ज्येष्ठ समाजसेवक अण्णा हजारे यांना धमकी दिल्या प्रकरणी पोलिसांनी दोघाजणांना उस्मानाबादमधून चौकशीसाठी ताब्यात घेतले आहे. पारनेर पोलिसांनी ही कारवाई केली.या कारवाईमुळे अण्णाना धमकी देण्यामागे राजकीय व्यक्तिमत्वाचे कारस्थान आहे का ?याकडे सर्वांचे लक्ष लागले आहे.
अण्णा हजारे यांना फोनवरून धमकी देण्यात आली होती. अण्णांच्या भ्रष्टाचार विरोधी कार्यालयात धमकीचे फोन येत होते. या प्रकरणी अण्णांच्या कार्यालयातील स्वयंसेवक शाम पठाडे यांनी पारनेर पोलिस ठाण्यात तक्रार दाखल केली होती. पारनेर पोलिसांचे पथक मंगळवारी उस्मानाबादकडे रवाना झाले होते.तेथून दोघांना ताब्यात घेण्यात आले आहे. त्यांची कसून चौकशी करण्यात येत आहे. हे दोघेजण कोण आहेत. याबाबत आणखी माहिती अद्याप मिळू शकलेली नाही.मात्र ते कोणत्या राजकीय नेत्याशी संबधित आहेत याचीही चौकशी होत आहे.
