जळगाव – घरकुल घोटाळ्यातील आरोपी आमदार सुरेश जैन हे सध्या धुळे कारागृहात आहेत. जैन यांची प्रकृती गंभीर असल्याने त्यांना रुग्णालयात दाखल करण्यात आल्याची अफवा गेल्या दोन दिवसांपासून जिल्ह्यात पसरविण्या येत आहेत. त्यामुळे त्यांच्या अनेक समर्थकांनी धुळ्याकडे धाव घेतली आहे. मात्र जैन यांची प्रकृती चांगली असल्याची माहिती मिळाल्याने या सर्व अफवाच असल्याचे स्पष्ट झाले आहे.
घरकुल घोटाळ्यात अटक झाल्यानंतर जैन हे गेल्या दोन वर्षांपासून कारागृहात आहेत. अटकेनंतर त्यांच्या प्रकृतीच्या तक्रारी सारख्या सुरूच आहेत. अटकेनंतर महिनाभराच्या आत त्यांच्यावर मुंबई येथील ब्रीच कॅन्डी रुग्णालयात बायपास शस्त्रक्रिया देखील करण्यात आली होती. त्यानंतर तब्बल वर्षभर जैन हे मुंबईच्या सेंट जॉर्ज रुग्णालयात उपचार घेत होते. तेथून डिचार्ज मिळाल्यानंतर जैन यांना जळगावच्या कारागृहात आणण्यात आले होते. त्यानंतर काही दिवसांनी त्यांना पुन्हा उपचारासाठी सिव्हील हॉस्पिटल येथे दाखल करण्यात आले होते.
घरकुल खटला धुळे कोर्टात वर्ग झाल्यानंतर जैन यांची रवानगी देखील धुळे कारागृहात करण्यात आली. त्यानंतर त्यांची तब्येत पुन्हा खालावल्याने त्यांना धुळे येथील सिव्हील हॉस्पिटल येथे दाखल करण्यात आले होते. दरम्यान त्यांच्या आरोग्याची तपासणी धुळे मेडीकल बोर्डासमोर करण्याचे आदेशही कोर्टाने दिले आहेत. असे असतांना अचानक त्यांची प्रकृती बिघडल्याबाबत उलटसुलट अफवांचा बाजार जळगावात भरला आहे. जैन हे गेले ३५ वर्षे जळगावच्या राजकाराणात असल्यामुळे त्यांचे चाहते मोठ्या प्रमाणावर आहेत. त्यामुळे त्यांच्या प्रकृतीबाबत अफवा सुरू होताच बहूतांश चाहत्यांनी प्रकृतीची खात्री करण्यासाठी धुळे गाठले आहे. मात्र चौकशीअंती जैन यांची प्रकृती चांगली असल्याचे निष्पन्न झाले. त्यांच्यासह खान्देश बिर्ल्डसचे संचालक नाना वाणी, राजा मयूर, आणि जळगाव महापालिकेचे माजी महापौर प्रदीप रायसोनी हे देखील सध्या कारागृहात आहेत.
