मुंबई – होमिओपॅथी पदवी घेतलेल्या डॉक्टरांना प्रॅक्टिस करताना अॅलोपॅथीच्या औषधांचाही वापर करता येणार आहे. राज्य मंत्रिमंडळाच्या विशेष बैठकीत हा महत्त्वपूर्ण निर्णय घेण्यात आला. सरकारच्या या निर्णयामुळे होमिओपॅथिक डॉक्टरांनी समाधान व्यक्त केलं आहे. गेल्या अनेक वर्षापासून राज्यातील होमिओपॅथिक डॉक्टरांनी यासाठी अनेकदा आंदोलने केली होती. अखेर आज त्यांच्या आंदोलनला यश आले आहे.
होमिओपॅथिक डॉक्टरांच्या मागण्यांकडे सातत्याने दुर्लक्ष केले जात होते. मंत्रिमंडळाच्या आजच्या बैठकीत त्यांच्या मागण्यांचा विचार करुन या निर्णयावर शिक्कामोर्तब करण्यात आले. मात्र होमिओपॅथीचं शिक्षण घेतल्यानंतर एक वर्षाचं अॅलोपॅथीचं प्रशिक्षण घेणं बंधनकारक असून त्यानंतरच त्यांना अॅलोपॅथीची प्रॅक्टिस करता येणार आहे. राज्य सरकारचे या निर्णयाचे होमिओपॅथिक डॉक्टरांनी स्वागत केले असले तरी, अॅलोपॅथी डॉक्टरांनी या निर्णयाला विरोध केला आहे.
