मुंबई – स्वतःचे खाते असलेल्या बँकेच्या एटीएम वापरावर चार्ज आकारला जात नाही. मात्र , आता प्रति महिना पाच ट्रान्झॅक्शननंतरच्या प्रत्येक एटीएम ट्रान्झॅक्शनवर खातेदाराला चार्ज लागू होण्याची शक्यता आहे. तशी शिफारस बँकांची शिखर संस्था ‘ इंडियन बँक्स असोसिएशन ‘ ने रिझर्व्ह बँकेला केली आहे. सध्या दुसऱ्या बँकेच्या एटीएमचा वापर केला तरच चार्ज आकारला जातो.
बेंगळुरूमध्ये एटीएम सेंटरमध्ये महिलेवर झालेल्या हल्ल्यानंतर प्रत्येक एटीएम सेंटरवर चोवीस तास सुरक्षा पुरवली पाहिजे , असे निर्देश सरकार स्तरावरून दिले गेले आहेत. त्याची अंमलबजावणी करायची तर एटीएम सेंटर चालू ठेवण्याचा खर्चही वाढणार आहे. त्यामुळे ‘ आयबीए ‘ ने एटीएमच्या वापरावर चार्ज आकारण्याची शिफारस केल्याची माहिती ‘ आयबीए ‘ चे चीफ एक्झिक्युटिव्ह मोहन टांकसाळे यांनी दिली.
पैसे काढण्यासाठी कुठल्याही खातेदाराला पाच एटीएम ट्रान्झॅक्शन्स पुरेशी आहेत. खात्यातील बॅलन्स पाहण्यासाठी बँकेकडून पाठवला जाणारा एसएमएसही पुरेसा ठरतो. त्यामुळे खातेदाराला महिन्याभरात सहाव्या ट्रान्झॅक्शन्सची फारशी गरजही लागणार नाही , असे टांकसाळे म्हणाले. ‘ आयबीए ‘ च्या शिफारशीमुळे खाते असलेल्या बँकेच्या एटीएम सेंटरमधून पैसे काढले तरी फी द्यावी लागेल.
वास्तविक , एटीएमच्या वापर मोफत करण्याचा निर्णय रिझर्व्ह बँकेने लादलेला नव्हता. बँक शाखांवरील कामाचे ओझे कमी व्हावे आणि ग्राहकांना मिळणाऱ्या सुविधांचा दर्जा वाढेल , या हेतूने तो बँकांनी स्वतःच घेतलेला होता.
