बॉलीवूडमधील नट्यांच्या कारकिर्दीमध्ये त्यांचे आईवडील नेहमीच लुडबूड करत असतात. चित्रपट निवडीपासून ते मानधनाचा आकडा ठरविण्यापर्यंत बहुतांश निर्णय तेच घेत असतात. आईवडिलांची अशी मदत मिळत असल्याने या नट्यांना सुरक्षित वाटत असले तरी कधी कधी त्यांचा हा हस्तक्षेप नुकसानकारकसुद्धा ठरतो. अभिनेत्री असीनच्या बाबतीत असेच घडले आहे. वडिलांच्या लुडबुडीमुळे तिच्या हातातून एक चांगला चित्रपट निसटला आहे.
काही दिवसांपूर्वी अनीस बाजमीचा चित्रपट वेलकमच्या सिक्वलमध्ये असीनची निवड झाल्याची खबर आली होती. मात्र अचानक तिचे नाव मागे पडून श्रुती हसनची या चित्रपटात वर्णी लागली. त्यावेळी यामागचे कारण कळू शकले नव्हते. मात्र आता अशी माहिती मिळाली आहे की, वेलकमच्या सिक्वलमधून असीनला वगळण्यास अन्य कुणी नाही तर तिचा पिता जोसेफ थोट्टमकुल हेच कारणीभूत ठरले आहेत. वेलकममध्ये काम करण्यासाठी जोसेफ यांनी आपल्या मुलीचे मानधन जरा जास्तच वाढविले होते.

सध्या असीन एका चित्रपटासाठी एक कोटीच्या आसपास मानधन घेते, पण तिच्या पित्याने त्यापेक्षा कितीतरी जास्त मानधनाची मागणी केली. त्याची पूर्तता करणे शक्य नसल्याने निर्मात्याने त्यांना बरेच समजावून पाहिले. मात्र ते आपल्या मागणीवरून मागे हटण्यास तयार नसल्याने अखेर नाइलाजाने तिला या चित्रपटातून अर्धचंद्र देत तिच्या जागी तत्काळ श्रुती हसनला करारबद्ध करण्यात आले.
असीन व श्रुतीच्या आधी या चित्रपटात सोनाक्षी सिन्हाला घेण्याचा विचार होता, पण तेही फिस्कटले. दुसरीकडे तिच्या मॅनेजरच्या म्हणण्यानुसार, असीन सध्या उमेश शुक्लाच्या एका चित्रपटात बिझी असून ऑक्टोबरमध्ये तो प्रदर्शित होणार आहे. त्यामुळे तारखांच्या गोंधळामुळे तिने हा चित्रपट सोडला. लवकरच अनीससोबत एखाद्या चित्रपटात ती काम करेल. असीनचा मॅनेजर भले काहीही खुलासा करत असला तरी हा चित्रपट हातातून जाण्यामागे तिच्या पित्याची लुडबूडच कारणीभूत ठरल्याचे समोर आले आहे.