लंडन दि.१० – विकिलिक्सचा संस्थापक ज्युलियन असांजे याची पॉपस्टार लेडी गागा हिने इक्वेडोरच्या दुतावासात जाऊन भेट घेतली असल्याचे समजते. स्थानिक वेळेनुसार सायंकाळी सात वाजता दूतावासात गेलेली लेडी गागा दोन तासांनी बाहेर पडली व या काळात तिने असांजे बरोबर डिनर घेतले असेही सांगितले जात आहे. असांजेच्या सुटकेसाठी ज्या नऊ सेलिब्रिटीज पाठिबा देत आहेत त्यात आता गागाचाही समावेश झाला आहे.

लैगिक छळाच्या आरोपावरून स्वीडनला हवा असलेल्या असांजेचे हस्तांतरण ब्रिटीश सरकारला करायचे आहे मात्र जूनच्या ९ तारखेपासूनच जामीनावर सुटल्यानंतर असांजेने इक्वेडोरच्या लंडन येथील दूतावासात आश्रय घेतला आहे. इक्वेडोरने त्याला त्यांच्या देशात आश्रय देण्याचेही मान्य केले आहे मात्र दूतावासातून बाहेर पडताच त्याच्यावर झडप घालण्यासाठी ब्रिटनचे स्कॉडलंड यार्ड दबा धरून बसले आहे.