गजनी फेम असिनची ओळख सध्या विनोदी चित्रपटात काम करणारी अभिनेत्री म्हणून झाली आहे. रेडी, हाउसफुल २ आणि बोल बच्चन या चित्रपटात तिने विनोदी भूमिका केली आहे. मात्र तिने आता विनोदी अभिनेत्रीच्या भूमिकेतून बाहेर पडण्याचे ठरविले आहे. वेगळ्या धाटणीच्या भूमिका ती यापुढे स्वीकारणार आहे.
असीन म्हणाली, भविष्य काळात वेगळी भूमिका करण्याचे ठरविले असले तरी त्यासाठी काही खास शैली अद्यापही ठरवलेली नाही. यापूर्वी मला विनोदी चित्रपटाचे आकर्षण होते त्यामुळे मी तसे चित्रपट स्वीकारले. आता मात्र त्यामधून बाहेर पडण्याचे ठरविले आहे. सध्या मी सशक्त भूमिकेची वाट पाहत आहे. ती कशीही असली तरी चालेल. त्यामध्ये स्वताच्या अभिनयाची भर घालून ती भूमिका यशस्वीपणे साकारण्याचा माझा प्रयत्न राहील.
दाक्षिणात्य चित्रपटसृष्टीतून अभिनयाची सुरुवात करणाऱ्या असिनाने बॉलीवूडमध्ये अल्पावधीतच नाव कमवले आहे. तिच्या बोल बच्चन चित्रपटाला मिळत असलेल्या यशामुळे ती भारावून गेली आहे. आगामी काळात तिचा अक्षयकुमार सोबतचा खिलाडी ७८६ हा चित्रपट येत आहे. या चित्रपटाकडूनही तिला खूप काही अपेक्षा आहेत.