नवी दिल्ली, दि.१६ – हातांनी मैला साफ करणार्‍यांचे प्रश्न आणि व्यथा मांडण्यासाठी अभिनेता आमीर खानने आज पंतप्रधान डॉ. मनमोहन सिंह यांची भेट घेतली. पंतप्रधानांनी आमीरला सामाजिक न्याय मंत्री मुकुल वासनिक यांच्याशी चर्चा करण्याचा सल्ला दिला असून आमीर आणि मुकुल वासनिक यांनी आज दुपारी संयुक्त पत्रकार परिषद घेतली. समाजातील सर्व नागरिकांना जगण्यासाठी समान अधिकार मिळायलाच हवा, पण देशात अशा प्रथा अजूनही देशात असल्याचे, मुकुल वासनिक यांनी म्हटले.
या समस्येवर उपाय योजला जाईल, असे आश्वासन मुकुल वासनिक यांनी दिले. सरकारने या मुद्द्याला गांभीर्याने घेतल्याबद्दल आमीरने समाधान व्यक्त केले. आमीर खानने सत्यमेव जयतेच्या ८ जुलै रोजी झालेल्या कार्यक्रमात मैला साफ करणार्‍यांच्या प्रश्नांना आणि व्यथांना वाचा फोडली होती. त्यानंतर समाजातील या प्रथेला मिटवण्याची चर्चा देशात सुरु झाली आहे.
भारतात आजही तीन लाख लोक हाताने मैला साफ करतात. सरकार पावसाळी अधिवेशनात नवे विधेयक मांडणार आहे. या विधेयकाद्वारे मैला साफ करण्याची प्रथा दूर करण्याचा प्रयत्न केला जाईल.