लंडन दि. ६ – लष्करे तैयब्बाशी संबंधित असलेल्या इंडियन मुजाहिद्दीन या दहशतवादी संघटनेवर गुरूवारी मध्यरात्री पासून ब्रिटनमध्ये बंदी घालण्यात आली. इंडियन मुजाहिद्दीन भारतात सतत करत असलेल्या दहशतवादी हल्ल्यात निरपराध नागरिक मारले जात आहेत आणि भारतात असलेल्या ब्रिटीश नागरिकांनाही या संघटनेमुळे धोका असल्याचे कारण या बंदीमागे देण्यात आले आहे. हाऊस ऑफ कॉमन्समध्ये या संबंधी झालेल्या चर्चेत सर्व सदस्यांनी या बंदीला एकमुखाने पाठींबा दर्शविला आहे. ब्रिटनमध्ये बंदी असलेल्या ४७ संघटनांत आता इंडियन मुजाहिद्दीनची भर या बंदीमुळे पडली आहे.

गृहसचिव थेरेसा मे या संबंधी हाऊस ऑफ कॉमन्समध्ये केलेल्या भाषणात म्हणाल्या की २००७ पासून इंडियन मुजाहिद्दीन भारतात सतत दहशतवादी हल्ले करत आहे. या संघटनेने सातत्याने हिंसाचाराचा अवलंब करून भारतात इस्लाम राज आणि शरिया कायदा आणण्याचे प्रयत्न चालविले आहेत. या संघटनेवर आम्ही बंदी घालत असून त्यांच्या कारवायांचा आम्ही निषेध करतो आहोत याचा हा स्वच्छ संदेश आहे. तसेच आंतरराष्ट्रीय दहशतवाद विरोधी लढ्यात आमच्या सहयोगी देशांना दिलेला शब्दही आम्ही या बंदीने पाळतो आहोत. अर्थात ही बंदी सखोल चौकशी अणि पुराव्यांच्या आधारावरच घातलेली असून हा एकाएकी घेतलेला निर्णय नाही.

होम ऑफिस मिनिस्टर जेम्स ब्रोकनशिअर यांनीही इंडियन मुजाहिद्दीनवरचा बंदीचा निर्णय वरवरचा नसल्याचे स्पष्ट केले. ते म्हणाले की या संघटनेसंबंधी उपलब्ध असलेल्या सर्व माहितीचा आणि पुराव्यांचा आढावा घेतल्यानंतरच हा निर्णय घेण्यात आला आहे. या संघटनेने अधिकाधिक माणसे मारली जावीत याच उद्देशाने हल्ले करताना बाजारासारख्या गर्दीच्या ठिकाणांचीच निवड केली आहेच पण ब्रिटीश पर्यटकांवर हल्ले करण्याची धमकीही त्यांनी वारंवार दिली आहे. पर्यायाने भारतातील ब्रिटीश नागरिकांना धोका निर्माण झाला आहे. निष्पाप नागरिकांना टार्गेट करणार्‍या दहशतवादी संघटनांविरूद्ध जगभरातील देशांनी एकत्र येणे गरजेचे असल्याचेही ते यावेळी म्हणाले.