लंडन, दि. ६- गतविजेता आणि अव्वल मानांकित सर्बियाचा नोवाक जोकोविच आणि तिसरा मानांकित स्वित्झर्लंडलडचा रॉजर फेडररने विम्बल्डन टेनिस स्पर्धेच्या उपांत्यपूर्व फेरीचा अडथळा पार केला. शुक्रवारी (६ जुलै) होणार्‍या उपांत्य फेरीत दोघे एकमेकांशी झुंजतील. फेडररने २६व्या मानांकित रशियाच्या मिखाइल यॉझ्नीचा ६-१, ६-२, ६-२ असा पराभव केला. जोकोविचने ३१व्या मानांकित जर्मनीच्या फ्लॉरियन मेयरला ६-४, ६-१, ६-४ असे सरळ तीन सेटसमध्ये नमवले.
मरे, फेरर, त्सोंगाला संधी
जोकोविच आणि फेडरर उपांत्य फेरीतच आमने-सामने आल्याने फेरर, मरे आणि त्सोंगा या तिघांना अंतिम फेरी गाठण्याची संधी आहे. विशेष म्हणजे सातवा मानांकित स्पेनचा डेव्हिड फेरर, चौथा मानांकित ब्रिटनचा ऍँडी मरे आणि पाचवा मानांकित फ्रान्सचा जो-विल्फ्रेड त्सोंगा या तिघांनी एकदाही विम्बल्डनची अंतिम फेरी गाठलेली नाही. यंदा दुसरा मानांकित स्पेनचा राफाएल नाडाल लवकर बाद झाल्याने या त्रिकुटाला जेतेपदाची संधी आहे.