नवी दिल्ली दि,५ – कर्नाटकात निर्माण झालेला पेचप्रसंग सोडविण्यासाठी आणि येडियुरप्पा समर्थकांनी नेतृत्व बदलासाठी ५ जुलैची दिलेली अंतिम मुदत लक्षात घेता भाजपच्या पक्षश्रेष्ठींनी मुख्यमंत्री सदानंद गौडा यांना नारळ देण्याचा निर्णय घेतल्याने आता गौडांची गच्छन्ति अटळ आहे. सदानंद गौडा यांच्या जागी येडियुरप्पानिष्ठ ग्रामविकास पंचायत राज मंत्री जगदिश शेत्तार यांची मुख्यमंत्रिपदी नियुक्ती केली जाण्याची चिन्हे आहेत.
भाजपमधील उच्चस्तरीय सूत्रांनी सांगितले की, पक्षश्रेष्ठींनी मुख्यमंत्री सदानंद गौडा, शेत्तार आणि प्रदेशाध्यक्ष ईश्वरप्पा यांची दिल्लीत मंगळवारी बाजू ऐकून घेतली. आता या प्रकरणी पुढील आठवड्यात निर्णय घेतला जाईल. सोमवार ते बुधवार दरम्यान केव्हाही निर्णय अपेक्षित आहे. कारण, नवीन नेता व त्यांच्या मंत्रिमंडळाचा शपथविधी हा १६ जुलै रोजी सुरू होणार्या विधिमंडळ अधिवेशनापूर्वी होणे अत्यंत आवश्यक आहे.