नवी दिल्ली, दि. ७ – द्रमुक नेते टी. आर. बालू आणि एम. के. स्टालिन यांनी गुरूवारी पंतप्रधान डॉ. मनमोहनसिंह यांची भेट घेतली. आगामी राष्ट्रपतीपदासाठी होणार्या निवडणुकीसंदर्भात ही भेट घेतल्याचे सांगण्यात येते. मात्र आपली ही सदिच्छा भेट असल्याचे द्रमुक नेत्यांकडून सांगण्यात आले. द्रमुकच्या या नेत्यांनी संयुक्त पुरोगामी आघाडीच्या नेत्या सोनिया गांधी यांचीही भेट घेतली.
पंतप्रधानांची भेट घेतल्यानंतर पत्रकारांशी बोलताना द्रमुक नेते स्टालिन म्हणाले की, राष्ट्रपतीपदाच्या उमेदवारीसंदर्भात द्रमुकचे अध्यक्ष एम. करूणानिधी यांनी संरक्षणमंत्री ए. के. अँथनी यांना जे सांगितले आहे, ती आमच्या पक्षाची अधिकृत भूमिका आहे.
संयुक्त पुरोगामी आघाडीनें राष्ट्रपतीपदाचे उमेदवार म्हणून अर्थमंत्री प्रणव मुखर्जी यांना निवडल्यास त्यास आपली काही हरकत नसल्याचे एम. करूणानिधी यांनी गेल्या ५ मे रोजी स्पष्ट केले होते.
