मुंबई, दि. ८ – गेल्या काही दिवसांपासून आंतरराष्ट्रीय बाजारामध्ये कच्च्या तेलाच्या किंमती मोठ्या प्रमाणात कमी झाल्या असल्या तरी रूपया कमकुवत झाल्याने त्याचा फायदा आपल्या देशाला मिळणार नाही, असे औद्योगिक संघटना असलेल्या असोचेमने म्हटले आहे. नुकताच डॉलरच्या तुलनेत रूपयाने सर्वकालीन निचांकी स्तर गाठला आहे.
जागतिक बाजारात कच्च्या तेलाच्या किंमती ८५ डॉलरपर्यंत खाली आल्या आहेत. काही महिन्यांपूर्वी तेलाचा दर १२५ डॉलर प्रति बॅरल होता. त्याच तुलनेत रूपयाचेही वेगाने अवमूल्यन झाले. रूपयाने डॉलरच्या समोर ४९ च्या स्तरावरून ५५ च्या खाली गटांगळी मारली. एकीकडे तेलाच्या किंमती कमी झाल्या असल्या तरी त्याचा फायदा होणार नाही. रूपयाच्या अवमूल्यनामुळे आयात बिलामध्ये आणखी वाढ होईल असे असोचेम ने म्हटले आहे.
देशात जवळपास ८३ टक्के कच्च्या तेलाची आयात केली होती. रूपया मार खात असल्यामुळे त्याचा मोठा फटका आयातीला बसेल असे असोचेमने आपल्या अहवालात म्हटले आहे.
तेलाच्या किंमती व चलन बाजारातील दरांवर नियंत्रण मिळविणे अशक्य आहे. यामुळे तेलाची आयात नियंत्रणात आणणे हाच एकमेव उपाय असल्याचे असोचेम ने म्हटले आहे. वाढत जाणा-या आयातीने परदेशी चलन साठयावर परिणाम होत आहे. २००२-०३ मध्ये देशात करण्यात आलेल्या कच्च्या तेलाची आयात एकूण परदेशी चलनसाठयाच्या २३.१८ टक्के झाली होती. तर २०१०-११ मध्ये हे प्रमाण ३४.८० टक्क्यांपर्यत वाढले होते.
