पणजी, दि. ५ – मान्सूनचे मंगळवारी केरळमध्ये आगमन झाले असून, पुढील ४८ तासात तो गोव्यात दाखल होणार असल्याचा अंदाज हवामान खात्याने व्यक्त केला आहे. दक्षिण कर्नाटकातील मंगलोर व जवळपासच्या परिसरावर मान्सूनचे ढग जमा झाले असल्याचे हवामान खात्याने म्हटले आहे.
सोमवारी सायंकाळी मान्सूनपूर्व पावसाच्या सरींबरोबरच गोव्याच्या अनेक भागांमध्ये मुसळधार पावसाने आपली हजेरी लावली. गोव्याबरोबरच कारवार, अंकोला आदी कर्नाटकाच्या सीमावर्ती भागांमध्ये तसेच कोल्हापूर, सांगली, सातारा आणि सिंधुदुर्ग जिल्ह्यातही वळवाच्या पावसाने हजेरी लावली. पुढील अठ्ठेचाळीस तासात गोव्याच्या तसेच कर्नाटक व महाराष्ट्राच्या किनारी भागांमध्ये, विशेषतः कोकण किनारपटटी भागातही मान्सून सरींचे आगमन होण्याची शक्यता हवामान खात्याने वर्तविली आहे.
