लंडन- राष्टप्रेम, प्रखर राष्ट्राभिमान यासाठी ब्रिटीश दीर्घकाळापासून नावाजले जातात. मात्र सध्याच्या जागतिक मंदीच्या फेर्याचा मोठा फटका ब्रिटनवासियांना बसला आहे. त्यामुळे अनेकांच्या नोकर्या गेल्या असून बेरोजगारांची संख्याही वाढत चालली आहे. याचा एक परिणाम असाही होताना दिसतो आहे की ब्रिटनमधील प्रचंड मॉल्स, दुकाने यातून वस्तू पळवून नेण्याचे प्रकार वाढले आहेत. दुकाने, मॉल्स, उद्योग व बाजारातील घडामोडींवर लक्ष ठेवणार्या सिटी वॉच कंपनीनेच असा अहवाल सादर केला आहे.
कंपनीने दिलेल्या अहवालानुसार मंदीमुळे बेरोजगारी वाढली आहे. परिणामी लोकांकडे पैसा आता कमी आहे. मात्र ज्यांना पूर्वी चांगले पैसे मिळत होते, जे नागरिक कांही दुकानातून सन्माननीय ग्राहक होते, त्यांनाही ही झळ बसते आहे. पैशांची चणचण आहे मात्र जीवनपद्धतीत बदल शक्य नाही असे लोक दुकानांतून चक्क वस्तू उचलेगिरी करून पळवत असल्याचे आढळले आहे. त्यातही ३० ते ४० वयोगटातील महिलांचे प्रमाण लक्षणीय असून या महिला सौंदर्य प्रसाधने, परफ्यूम्स, सेंटस ,अंतर्वस्त्रे, अशा वस्तू चोरत असल्याचे गुन्हेगारी विरोधी पथकानेही कबूल केले आहे.
या प्रकाराला आळा बसावा म्हणून सिटी वॉच कंपनीने अशा चोर्या करताना पकडल्या गेलेल्या नागरिकांची नांवेच वेबसाईटवर देण्याचा निर्णय घेतला असून त्यामुळे या चोर्या कमी होतील अशी त्यांची अपेक्षा आहे.
