`बँड बाजा बारात’ चित्रपटामध्ये अनुष्का शर्मासोबत जोडी जमवून बॉलीवूडमध्ये दाखल झालेल्या रणवीर सिंगची जोडी आता करिना कपूरसोबत जमली आहे. संजय भन्सालीने आपल्या आगामी रामलीला या सिनेमात रणवीर आणि करिना यांना एकत्र आणले आहे. मागील बर्याच दिवसांपासून चर्चेत असलेल्या या चित्रपटाच्या चित्रीकरणाचा मुहूर्त अखेर गवसला आहे. भन्साली जुलै महिन्यात रामलीलाचे चित्रीकरण सुरू करणार आहे. गुजरातमध्ये या चित्रपटाचे चित्रीकरण पूर्ण करण्याची भन्सालीची योजना आहे.
जुलैपासून रणवीरसोबत चित्रीकरणाला प्रारंभ करण्यात येणार असून ऑगस्ट महिन्यात करिनाही शूटिंगमध्ये सहभागी होणार असल्याची माहिती मिळाली आहे. ही आजच्या काळातील लव्हस्टोरी असल्याचे सांगितले जात आहे. भन्सालीचे सर्वच चित्रपट प्रवाहापेक्षा खूप वेगळे असतात. आशयघन पटकथा, भव्यदिव्य सेट, श्रवणीय संगीत आणि बड्या कलाकारांच्या अभिनयाची जादू हे भन्सालीच्या सिनेमांचे वैशिष्ट्य मानले जाते. याच कारणांमुळे रसिकांना नेहमीच भन्सालीच्या चित्रपटाची उत्सुकता लागलेली असते. `रामलीला’ हा आपला आगामी चित्रपटही याच परंपरेला साजेसा असेल असे भन्सालीचे म्हणणे आहे.
