पुणे दि.२१- समाज कल्याण विभागाची पुण्यातील सर्व कार्यालये आता येरवडा येथील १० एकर जागेत उभारण्यात येत असलेल्या संकुलात हलविण्यात येणार आहेत. त्यामुळे नागरिकांना एकाच छत्राखाली आवश्यक ते सर्व दाखले जसे मिळू शकणार आहेत, तसेच या विभागाच्या शहरात विविध ठिकाणी असलेल्या कार्यालयांपोटी भरावे लागणारे लाखो रूपयांचे भाडेही वाचणार आहे. या इमारतीत जात पडताळणी, जात प्रमाणपत्र, जिल्हा सामाजिक कल्याण विभाग, समाजकल्याण विभागाचे हॉस्टेल, प्रादेशिक आयुक्त कार्यालय, मागास जात बोर्ड, व कॉम्प्युटर प्रशिक्षण सेंटर अशी अनेक कार्यालये असतील. सामाजिक न्यायभवन असे या इमारतीचे नांव आहे.

समाज कल्याण अधिकारी प्रभाकर परदेशी याबाबत अधिक माहिती देताना म्हणाले की राज्यातील २८ जिल्ह्यांना अशी सामाजिक न्यायभवने आहेत. पुण्याला ते पुढच्या वर्षापर्यंत होणार आहे. या इमारतीसाठी चाळीस कोटी रूपयांचे बजेट होते मात्र येरवडा येथील जमीन अधिग्रहण करण्यातच अनेक अडचणी आल्या होत्या. आता सर्व अडथळे पार झाले आहेत. पुण्यात असलेल्या विविध कार्यालयांच्या भाड्यापोटीही लाखो रूपये भरावे लागत होते. उदाहरणार्थ प्रादेशिक आयुक्त कार्यालयाचे दर महिना ७५ हजार रूपये भाडे पुणे मनपाकडे भरावे लागत होते.आता भाड्यापोटी जाणारी रक्कम वाचणार आहेच पण नागरिकांनाही दाखले मिळविताना विविध ठिकाणी जे हेलपाटे मारावे लागत होते त्याची आवश्यकता राहणार नसून सर्व दाखले एकाच इमारतीत मिळू शकणार आहेत.