सनी लिओनला का देण्यात आली नाही हैदराबादमध्ये परफॉर्म करण्याची परवानगी?

बॉलीवूड अभिनेत्री सनी लिओन हैदराबादच्या जुबली हिल्स येथील इल्युजन पबमध्ये डीजे नाईटमध्ये परफॉर्म करणार होती. आपल्या आवडत्या अभिनेत्रीचा परफॉर्मन्स पाहण्यासाठी अनेकांनी BookMyShow च्या माध्यमातून तिकिटेही खरेदी केली होती. डीजे नाईटची वेळ रात्री 11 ते 12.30 अशी होती, ज्यामध्ये 500 हून अधिक लोक सहभागी होणार होते. मात्र हा शो होऊ नये, म्हणून 8 वाजल्यापासून पबबाहेर 100 हून अधिक पोलीस तैनात करण्यात आले होते.

पोलिसांचा बंदोबस्त पाहून चाहते खूपच निराश दिसले, हे हाताळण्यासाठी आयोजकाने पबच्या स्क्रीनवर एक व्हिडिओ संदेश दिला. ज्यामध्ये सनी लिओनच्या प्रकृती अस्वास्थ्यामुळे ती परफॉर्म करू शकणार नाही, पण बॉलीवूडच्या थीमनुसार क्लब सुरू राहील, असे सांगण्यात आले होते. शेवटी त्यांनी गैरसोयीबद्दल तेथे आलेल्या सर्वांची माफी मागितली. हा मेसेज पाहिल्यानंतर अनेक जण तेथून निघून गेले.

मात्र, मिळालेल्या माहितीनुसार, आयोजकांना सनी लिओनच्या शोला परवानगी मिळाली नव्हती, मात्र तरीही त्यांनी त्यांच्या नियोजनानुसार काम सुरू ठेवले. लोकांनी तिकीटही बुक केले आणि सनी लिओनलाही हैदराबादला बोलावण्यात आले. ही परिस्थिती आपसूकच सुधारेल असे आयोजकांना वाटत होते, पण तसे झाले नाही. शांतता राखण्यासाठी पोलीस पबच्या बाहेर 1 वाजेपर्यंत तैनात होते.