भारत आणि न्यूझीलंड यांच्यातील तिसरा सामना सुरु झाला आहे. न्यूझीलंडने पुण्याचा कसोटी हिरो मिचेल सँटनरला तिसऱ्या सामन्यातून वगळले आहे. सँटनरने गेल्या सामन्यात 13 बळी घेत भारतीय संघाला गुडघे टेकण्यास भाग पाडले होते. त्याच्या उत्कृष्ट कामगिरीसाठी त्याला सामनावीर म्हणूनही निवडण्यात आले. असे असतानाही न्यूझीलंडच्या कर्णधाराने त्याला तिसऱ्या सामन्यातून बाहेर ठेवले आहे. लॅथमने त्याला खेळू न देण्यामागील दुखापतीचे कारण सांगितले आहे. मुंबई कसोटीत त्याच्या जागी लेगस्पिनर ईश सोधीला स्थान देण्यात आले आहे.

न्यूझीलंडचा कर्णधार टॉम लॅथमने मिचेल सँटनरच्या दुखापतीबद्दल सांगितले की तो साइड स्ट्रेनशी झुंजत आहे. शेवटच्या सामन्यातही सँटनर यामुळे त्रासात दिसला होता आणि आता तो पूर्णपणे बाहेर गेला आहे. मात्र, त्याने संपूर्ण सामना खेळला आणि पहिल्या डावात 7 आणि दुसऱ्या डावात 6 विकेट्स घेतल्या. त्याच्यासमोर भारतीय फलंदाज हतबल दिसत होती.

आता मुंबई कसोटीत त्याच्या अनुपस्थितीमुळे भारतीय संघाने सुटकेचा नि:श्वास सोडला आहे. विशेषत: विराट कोहलीला यातून दिलासा मिळणार आहे, कारण गेल्या सामन्याच्या दोन्ही डावांत सँटनरने त्याची विकेट घेतली होती. याशिवाय अलीकडच्या काळात तो डावखुरा फिरकीपटूंविरुद्ध संघर्ष करत आहे.

मिचेल सँटनरने पुणे कसोटीत कारकिर्दीत पहिल्यांदाच 5 बळी घेण्याचा पराक्रम केला होता. एवढेच नाही तर 13 विकेट घेऊन तो न्यूझीलंडकडून भारतात सर्वोत्तम कामगिरी करणारा तिसरा गोलंदाजही ठरला. एका कसोटीत सर्वाधिक विकेट घेणारा सँटनर भारतातील दुसरा सर्वोत्तम डावखुरा फिरकी गोलंदाज ठरला. त्याचा नंबर-1 वरचा सहकारी एजाज पटेल आहे, ज्याने 2021 मध्ये मुंबई कसोटीत 14 बळी घेतले होते.