आठवड्यातील केवळ 5 दिवस काम करण्याची संधी मिळावी, जेणेकरून शनिवार आणि रविवारची सुट्टी मिळावी, अशी अनेक दिवसांपासून बँक कर्मचाऱ्यांची मागणी आहे. देशातील अनेक खासगी कंपन्या 2 दिवसांची साप्ताहिक सुट्टी देतात. तिथे आठवड्यातून फक्त 5 दिवस काम करावे लागते. आता हे बँकांमध्येही पाहायला मिळू शकते. हा बदल सरकारी आणि खाजगी अशा दोन्ही क्षेत्रात एकाच वेळी दिसून येऊ शकतो. या दिशेने प्रगती होत असल्याचे दिसते, कारण या मागणीबाबत इंडियन बँक्स कॉन्फेडरेशन (IBA) आणि बँक कर्मचारी संघटना यांच्यात एकमत झाले आहे.
बँकांमध्ये आता होणार फक्त 5 दिवस काम, कधीपासून लागू होणार 2 दिवस सुट्टीचा नियम?
आता या निर्णयाला सरकारच्या अंतिम मंजुरीची प्रतीक्षा आहे. जर सर्व काही योजनेनुसार झाले, तर वर्षाच्या अखेरीस किंवा पुढील वर्षाच्या सुरुवातीस, बँक कर्मचाऱ्यांना दर शनिवार आणि रविवारी सुट्टी मिळण्याची शक्यता आहे. इंडियन बँक्स कॉन्फेडरेशन आणि बँक कर्मचारी संघटना यांच्यात झालेल्या करारानुसार सर्व सरकारी आणि खाजगी बँका या नियमात येतील. मात्र, त्याची अंमलबजावणी करण्यापूर्वी रिझर्व्ह बँक ऑफ इंडियाची (आरबीआय) परवानगी घ्यावी लागेल, कारण बँकांच्या कामकाजावर आरबीआय लक्ष ठेवते.
बँक कर्मचाऱ्यांसाठी हे पाऊल खूप महत्त्वाचे ठरू शकते, कारण आतापर्यंत त्यांना प्रत्येक महिन्याच्या दुसऱ्या आणि चौथ्या शनिवारीच सुट्टी दिली जाते. उर्वरित शनिवारी बँका सामान्यपणे उघडतात. 2015 पासून बँक संघटनांनी दर शनिवारी सुट्टी द्यावी अशी मागणी केली होती आणि आता ही मागणी जवळपास पूर्ण होण्याच्या मार्गावर आहे.
या प्रस्तावाला सरकारने मंजुरी दिल्यास बँकांच्या कामाच्या वेळाही बदलल्या जातील. सध्या बँका सकाळी 10 ते सायंकाळी 5 वाजेपर्यंत काम करतात, मात्र नवीन नियमानुसार बँका सकाळी 9:45 वाजता उघडतील आणि सायंकाळी 5:30 वाजता बंद होतील. याचा अर्थ असा होईल की बँक कर्मचारी दिवसातून 45 मिनिटे अतिरिक्त काम करतील, परंतु आठवड्यातून दोन दिवस सुट्टी मिळेल. हा बदल कर्मचाऱ्यांना दिलासा देणारा तर ठरेलच, पण बँकिंग क्षेत्रात काम करण्याची परिणामकारकताही वाढवू शकेल. कर्मचारी अधिक ऊर्जा आणि मनोबल घेऊन काम करू शकतील, ज्यामुळे ग्राहकांना चांगली सेवाही मिळू शकेल.
2015 मध्ये सरकार, RBI आणि IBA यांच्यात झालेल्या करारानुसार महिन्याच्या दुसऱ्या आणि चौथ्या शनिवारी सुट्टी देण्याचा नियम लागू करण्यात आला होता. तेव्हापासून बँक संघटना शनिवार आणि रविवार या दोन्ही सुट्ट्या जाहीर कराव्यात असा आग्रह धरत आहेत. आता यावर जवळपास एकमत झाले असून शासनाच्या अंतिम मंजुरीनंतर ही प्रणाली कार्यान्वित होणार आहे. या वर्षाच्या अखेरीस किंवा पुढील वर्षाच्या सुरुवातीला सरकार याबाबत ठोस निर्णय घेईल, अशी आशा बँक कर्मचाऱ्यांकडून व्यक्त होत आहे.