IPL 2023 मध्ये खेळणाऱ्या 3 खेळाडूंना ‘नियम’ मोडल्याबद्दल शिक्षा, सामना खेळण्यावरही समोर आले मोठे अपडेट

शिक्षा सुनावण्यात आलेल्या तीन खेळाडूंमध्ये या सामन्यातील मुंबई इंडियन्सचा कर्णधार सूर्यकुमार यादव, केकेआरचा कर्णधार नितीश राणा आणि मुंबई इंडियन्सचा गोलंदाज ऋतिक शोकीन यांचा समावेश आहे. प्रत्येक खेळाडूला वेगवेगळी शिक्षा मिळाली असून मॅच रेफरीसमोर आपली चूक मान्य केल्यानंतर ही शिक्षा त्यांना देण्यात आली आहे.

आता जाणून घ्या या तिघांची एक-एक चूक आणि शिक्षा. सर्वप्रथम, या सामन्यात मुंबई इंडियन्सचा कर्णधार असलेला सूर्यकुमार यादव स्लो ओव्हर रेटसाठी दोषी आढळला आहे. आणि या बदल्यात त्याला 12 लाख रुपयांचा दंड ठोठावण्यात आला आहे. सूर्यकुमार यादव हा आयपीएल 2023 मधला चौथा कर्णधार आहे ज्याला स्लो ओव्हर रेटमुळे 12 लाखांचे नुकसान झाले आहे. त्याच्याआधी फाफ डु प्लेसिस, संजू सॅमसन आणि हार्दिक पांड्यालाही दंड ठोठावण्यात आला आहे.

केकेआरचा कर्णधार नितीश राणाला सामन्यादरम्यान मैदानावर अपशब्द वापरल्याबद्दल शिक्षा झाली आहे. मॅच रेफरीने त्याला आयपीएल आचार संहितेच्या कलम 2.21 अंतर्गत लेव्हल 1 च्या गुन्ह्यासाठी दोषी ठरवले आहे. त्याच्या मॅच फीमध्ये 25 टक्के कपात करण्यात आली आहे.

नितीश राणाशिवाय मुंबई इंडियन्सचा गोलंदाज ऋतिक शोकीनलाही नियमांचे उल्लंघन केल्याप्रकरणी दंड ठोठावण्यात आला आहे. त्याच्या मॅच फीमध्ये 10 टक्के कपात करण्यात आली आहे. त्याला आयपीएलच्या आचारसंहितेच्या कलम 2.5 अंतर्गत लेव्हल 1 साठी दोषी ठरवण्यात आले आहे.

खरे तर नितीश आणि ऋतिक या दोघांमध्ये मैदानावर बाचाबाची झाली होती, त्यानंतर बराच गदारोळ झाला होता. ही घटना केकेआरच्या डावाच्या 9व्या षटकात घडली, जेव्हा ऋतिक शोकीनने नितीश राणाची विकेट घेतल्यावर जल्लोष केला.

मात्र, चांगली गोष्ट म्हणजे या घटनेनंतरही या खेळाडूंना सामना खेळण्यास बंदी घालण्यात आलेली नाही. त्यांना फक्त त्यांच्याच चुकांसाठी दंड ठोठावण्यात आला आहे. म्हणजे हे तिघेही पुढील सामन्यात त्यांच्या संघासाठी उपलब्ध असतील.