भारताचा लेगस्पिनर युजवेंद्र चहलने लॉर्ड्स वनडेवर वर्चस्व गाजवले. गुरुवारी (14 जुलै) झालेल्या तीन सामन्यांच्या मालिकेतील दुसऱ्या सामन्यात चहलने इंग्लंडच्या फलंदाजाला जबरदस्त नाचवले. फिरकीची जादू करत या उजव्या हाताच्या गोलंदाजाने एक मोठा विक्रम आपल्या नावावर केला. त्याने 10 षटकात 47 धावा देत चार विकेट घेतल्या. लॉर्ड्सवरील वनडेमध्ये भारतीय पुरुष गोलंदाजाची ही सर्वोत्तम कामगिरी आहे.
याचदरम्यान चहलने 39 वर्षे जुना विक्रम मोडला. त्याने मोहिंदर अमरनाथला मागे टाकले. अमरनाथने 1983 विश्वचषकाच्या अंतिम सामन्यात वेस्ट इंडिजविरुद्ध 3/12 विक्रम केला होता. त्यांच्यानंतर आशिष नेहरा या बाबतीत दुसऱ्या क्रमांकावर आहे. नेहराने 2004 मध्ये इंग्लंडविरुद्ध 26 धावांत तीन विकेट घेतल्या होत्या.
महिला आणि पुरुषांमध्येही अव्वल आहे चहल
पुरुष आणि महिला या दोन्ही संघांचे रेकॉर्ड पाहिले तरी चहल अजूनही अव्वल आहे. अर्चना दास या बाबतीत दुसऱ्या क्रमांकावर आहेत. 2012 मध्ये इंग्लंडविरुद्ध 61 धावांत चार विकेट घेण्यात दास यशस्वी ठरली होती. तिच्या खालोखाल तिसऱ्या क्रमांकावर मोहिंदर अमरनाथ, चौथ्या स्थानावर झुलन गोस्वामी आणि पाचव्या स्थानावर आशिष नेहरा आहे. 2017 च्या महिला विश्वचषकाच्या अंतिम सामन्यात झुलनने इंग्लंडविरुद्ध 23 धावांत तीन विकेट्स घेण्यात यश मिळवले होते.
शेन वॉर्ननंतर चहलने केली ही कामगिरी
लॉर्ड्सवर 23 वर्षांनंतर लेगस्पिनरने वनडेमध्ये चार किंवा त्याहून अधिक विकेट्स घेतल्या आहेत. शेन वॉर्नने शेवटच्या वेळी 1999 च्या विश्वचषकाच्या अंतिम फेरीत अशी कामगिरी केली होती. वॉर्नने पाकिस्तानविरुद्ध नऊ षटकांत 33 धावांत चार बळी घेतले.
चहलने साधली कुलदीप-जडेजाची बरोबरी
परदेशात चार किंवा त्याहून अधिक बळी घेणाऱ्या फिरकी गोलंदाजांमध्ये युझवेंद्र चहल संयुक्त दुसऱ्या स्थानावर पोहोचला आहे. चहलने पाचव्यांदा ही कामगिरी केली आहे. त्याने रवींद्र जडेजा आणि कुलदीप यादव यांची बरोबरी केली. या बाबतीत अनिल कुंबळे आघाडीवर आहे. कुंबळेने सात वेळा परदेशात एकदिवसीय सामन्यात चार किंवा त्याहून अधिक बळी घेतले आहेत.
चहलने केली बुमराह आणि जडेजाची बरोबरी
चहलने एका बाबतीत बुमराह आणि जडेजाची बरोबरी केली आहे. इंग्लंडमधील एकदिवसीय सामन्यात चार किंवा त्याहून अधिक बळी घेणाऱ्या गोलंदाजांच्या यादीत तो संयुक्त दुसऱ्या स्थानावर पोहोचला आहे. चहलची ही दुसरी वेळ आहे. जडेजा आणि बुमराह यांनीही प्रत्येकी दोनदा चार किंवा त्याहून अधिक बळी घेतले आहेत. मोहम्मद शमी या बाबतीत आघाडीवर आहे. असे त्याने तीन वेळा केले आहे.