मुंबई : हनुमान चालिसा वादावरून तुरुंगात असलेल्या खासदार नवनीत राणा यांची प्रकृती खालावली आहे. वृत्तानुसार, त्यांना जेजे रुग्णालयात दाखल करण्यात आले आहे. त्या अजूनही भायखळा कारागृहातच होत्या. यापूर्वी 2 मे रोजी त्यांची प्रकृती खालावली होती. तेव्हा राणांच्या वकिलाने तुरुंगात वैद्यकीय मदत दिली जात नसल्याचा आरोप केला होता. राणांच्या वकिलाने तुरुंग अधीक्षकांना पत्र लिहून लवकरात लवकर वैद्यकीय मदत देण्याची विनंती केली होती. राणांना योग्य उपचार मिळत नसल्याचा आरोप वकिलाने केला होता. सीटी स्कॅन केल्याशिवाय उपचार करू नका, असे वकिलांनी सांगितले आहे.
आज येऊ शकतो जामीन अर्जावर निर्णय
राणा दाम्पत्याच्या जामीन अर्जावर आज निर्णय येऊ शकतो. याआधी सोमवारीही सुनावणी झाली, पण निर्णय आला नाही. सुरुवातीला न्यायालयात इतर प्रकरणांची सुनावणी आणि नंतर वेळेच्या कमतरतेमुळे सोमवारी निर्णय होऊ शकला नाही. राणा दाम्पत्याविरुद्ध आयपीसीच्या कलम 15A, 353 आणि मुंबई पोलीस कायद्याच्या कलम 135 अंतर्गत एफआयआर दाखल करण्यात आला आहे. याशिवाय राणा दाम्पत्यावर 124A म्हणजेच देशद्रोहाचे कलमही लावण्यात आले आहे.
23 एप्रिल रोजी करण्यात आली होती अटक
नवनीत राणा आणि त्यांचा पती रवी राणा यांना 23 एप्रिल रोजी मुंबई पोलिसांनी अटक केली होती. महाराष्ट्राचे मुख्यमंत्री उद्धव ठाकरे यांच्या निवासस्थानी असलेल्या मातोश्रीबाहेर हनुमान चालीसा पठणावरून झालेल्या वादातून दोघांना अटक करण्यात आली. तेव्हापासून राणा दाम्पत्य न्यायालयीन कोठडीत असून उच्च न्यायालयाने त्यांचा जामीन अर्ज फेटाळला आहे.