छोट्या पडद्यावरील मालिका आणि रंगभूमीवरील नाटक या माध्यमातून प्रेक्षकांना खळखळून हसवणारी आणि सामाजिक परिस्थितीवर भाष्य करत अंतर्मुख करणारी गंगुबाई आणि छू या जोडगोळीची धमाल आता मोठ्या पडद्यावर बघायला मिळणार आहे. ’कुमारी गंगुबाई नॉन मॅट्रिक’ याच नावाने येणाऱ्या या चित्रपटात निर्मिती सावंत आणि पंढरीनाथ कांबळे सह नागेश भोसले आणि आनंद इंगळे यांच्या अभिनयाचीही विनोदी जुगलबंदी बघायला मिळणार आहे.
विद्याधर पाठारे यांच्या ’ आयरिस प्रॉडक्शन ’ ची निर्मिती असलेल्या या चित्रपटाची प्रस्तुती ’व्हायकॉम १८ ’ ची आहे. मालिका आणि नाटकाप्रमाणे या चित्रपटाची कथा-पटकथा-संवाद-दिग्दर्शन राजेश देशपांडे यांचं आहे. २७ सप्टेंबर पासून हा चित्रपट प्रेक्षकांच्या भेटीस येत आहे.
छोट्या पडद्यावर गंगुबाई आणि छू यांच्या जोडीने धम्माल केली. आपल्या आजूबाजूच्या लोकांना येणाऱ्या अडचणी गंगुबाई आपल्या स्टाईलने सोडवायची आणि या कामात छू तिला साथ द्यायचा. तिच्या या कामगिरीमुळे गंगुबाईने लहानांपासून मोठ्यापर्यंत सर्वाना आपलं केलं होतं. साप्ताहिक मालिकेत जास्तीत-जास्त भागांचा विक्रमही गंगुबाईने आपल्या नावावर नोंदवला होता. त्यानंतर याच मुख्य पात्रांना घेऊन आलेल्या नाटकालाही प्रेक्षकांनी भरभरून प्रतिसाद दिला होता.
मालिका आणि नाटकांमधून सामाजिक समस्या सोडवत त्यावर चिमटे काढत भाष्य करण्याचे काम गंगुबाईने केले आहे. आता चित्रपटात गंगुबाई सामाजिक प्रश्न सोडवणार आहे ते थेट राजकारणाच्या माध्यमातून. आपल्या लोकांच्या समस्या सोडवण्यासाठी गंगुबाई निवडणुकीच्या मैदानात उतरणार आहे. सामाजिक आणि राजकीय प्रश्नांची जाण आणि त्यावर मार्मिक पद्धतीने कोट्या करत चिमटे काढणं यात लेखक दिग्दर्शक राजेश देशपांडे यांचा हातखंडा आहे आणि असेच विनोदी प्रसंग या चित्रपटात प्रेक्षकांना बघायला मिळणार आहेत.
‘कुमारी गंगुबाई नॉनमॅट्रिक ’ या चित्रपटाला शैलेंद्र बर्वे यांचं संगीत असून यातील गीतं राजेश देशपांडे यांनी लिहिली आहेत तर सुजीत कुमार आणि राजेश बिडवे यांचं नृत्य दिग्दर्शन आहे. आपल्या खास शैलीसाठी प्रसिद्ध असलेले संजय जाधव यांनी या चित्रपटाचं छायांकन केलं आहे.
मराठीमध्ये ’ झपाटलेला २ ’ हा पहिला थ्रीडी चित्रपट आणि ’ ७२ मैल एक प्रवास ’ सारखी आशयघन कलाकृती यशस्वीपणे सादर करणाऱ्या ’ व्हायकॉम १८ मोशन पिक्चर्स ’ ने याही चित्रपटाच्या प्रस्तुतीची जबाबदारी सांभाळली आहे. छोट्या पडद्यावर गंगुबाई सोबतच अग्निशिखा आणि इतर बऱ्याच लोकप्रिय मालिका देणाऱ्या विद्याधर पाठारे यांच्या ’ आयरिस प्रोडक्शन ’ ने या चित्रपटाची निर्मिती केली आहे.
