मुंबई – बॉलिवूडमधील सर्वाधिक प्रभावशाली जोडी म्हणून ओळख असलेल्या अमिताभ आणि जया बच्चन यांना शांततेत, कुटुंबापासून दूर, मित्रमंडळींपासून दूर राहावेसे वाटू लागले असल्याची वार्ता आहे. फ्रान्सची राजधानी आणि फॅशन आणि रोमान्ससाठी जगभर प्रसिद्ध असलेल्या पॅरिस शहराची दोघांनाही ओढ आहे. दोन वर्षांपूर्वी लग्नाचा वाढदिवस साजरा करताना अमिताभने जयाला फ्रान्स कंट्रीसाईड आणि पॅरिसची सफर एकमेकांच्या सहवासात करण्याचे आश्वासन दिले होते आणि ते आता त्यांनी पुरे केले आहे असे समजते.

आजपर्यंत धावपळीचे आयुष्य जगलेल्या या जोडप्याला आता शांत जीवन हवेसे वाटू लागले आहे. लाडक्या पत्नीची इच्छा पुरविण्यासाठी अमिताभ यांनी पॅरिसमध्ये घरच खरेदी केल्याचे वृत्त असून जया बच्चन हे घर मनासारखे सजविण्यात सध्या गुंतल्या आहेत असे सांगितले जात आहे. अमिताभ यांनी मात्र ही बातमी पूर्णपणे खरी नसल्याचे स्पष्ट करताना सध्या ते दोघेही देशाबाहेर आहेत मात्र लवकरच मायदेशी परतत आहेत असा खुलासा केला आहे.