इस्लामाबाद दि.३० – पाकिस्तानच्या उत्तर पश्चिम भागातील डेरा इस्माईलखान शहरातील मध्यवर्ती तुरूंगावर सोमवारी रात्री सशस्त्र तालिबानी अतिरेक्यांनी ग्रेनेड, मशिनगन्स व रॉकेटच्या सहाय्याने हल्ला चढवून तेथे असलेल्या तालिबानी तसेच बंदी असलेल्या दहशतवादी संघटनांचे ३०० हून अधिक कैदी मुक्त केले असल्याचे समजते. पोलिस वेशात तुरूंगात घुसलेल्या या अतिरेक्यांनी सुरवातीला घडविलेल्या स्फोटात तुरूंगाची बाहेरची संरक्षक भिंत फोडली आणि तुरूंगात प्रवेश केला. गोळीबार करतच हे अतिरेकी कैद्यांच्या कोठड्यांकडे गेले आणि त्यांनी कैद्यांना मुक्त केले. यावेळी तुरूंग विभागाच्या मदतीला तातडीने आलेल्या पाकिस्तानी लष्कराबरोबर या अतिरेकयांची चकमक उडली. मंगळवार पहाटेपर्यंत या परिसरातून गोळीबारचे आवाज ऐकू येत होते.